VIDEO: ჯოკოვიჩის ტრიუმფი ჩინეთში - მერამდენე ტიტული მოიგო ნოლემ?

ნოვაკ ჯოკოვიჩმა ჩინეთის ღია პირველობაზე რეკორდული, მე-7 ტიტული მოიპოვა.

პეკინში გამართული ფინალის მეორე სეტის დასაწყისში ალექს დე მინორმა შეხვედრის გაგრძელება ტრავმის გამო ვეღარ შეძლო.

ATP-ის რეიტინგის ყოფილმა პირველმა ჩოგანმა, ჯოკოვიჩმა პირველი სეტი 7:6(3) მოიგო, რის შემდეგაც ორივე ჩოგბურთელმა სამედიცინო ტაიმ-აუტი აიღო.

დე მინორმა კორტი საზარდულის ტრავმის სამკურნალოდ დატოვა. ავსტრალიელი თამაშს დაუბრუნდა, თუმცა მეორე სეტის პირველი გეიმის მოგების შემდეგ მატჩის შეწყვეტა გადაწყვიტა.

ეს ჯოკოვიჩის კარიერაში ATP-ის დონეზე მოპოვებული 102-ე ტიტულია. ამ მაჩვენებლით ის როჯერ ფედერერს, რომელსაც 103 ტიტული აქვს, მხოლოდ ერთით ჩამორჩება.

ღია ერაში ყველაზე მეტი, 109 ტიტული, ჯიმი კონორსს აქვს. 39 წლის სერბმა ATP 500-ის პეკინის ტურნირზე იდეალური შედეგიც გააუმჯობესა და მისი ბალანსი ახლა 34-0-ს შეადგენს.

ჯოკოვიჩი პეკინში წელს 2015 წლის შემდეგ პირველად დაბრუნდა. მაშინ მან ფინალში რაფაელ ნადალი დაამარცხა და ჩინეთის ღია პირველობის ჩემპიონი მეექვსედ გახდა.

მიმდინარე ტურნირზე ჯოკოვიჩმა დრამატულ 1/4 ფინალში პირველ ნომრად განთესილ ალექსანდერ ზვერევს მოუგო, 1/2 ფინალში კი დანილ მედვედევს ხვდებოდა და მატჩის მოსაგებად აწვდიდა, როდესაც რუსი ჩოგბურთელი დისკვალიფიკაციის გამო შეხვედრიდან მოიხსნა.

ჯოკოვიჩი ასევე გახდა ღია ეპოქის ისტორიაში პირველი მამაკაცი ჩოგბურთელი, რომელმაც ATP-ის ტურნირზე ტიტულის მოგება ზედიზედ 21 სეზონში მოახერხა. ამ წარმატებით მან მნიშვნელოვნად გაიუმჯობესა შემაჯამებელ ტურნირზე დაბრუნების შანსებიც.

ჯოკოვიჩი შემაჯემებელი ტურნირის რეიტინგში 6 პოზიციით დაწინაურდა და მე-9 ადგილზე გადავიდა. ამჟამად ის მე-10 პოზიციაზე მყოფ დე მინორს 140 ქულით უსწრებს.