WTA-ს წლის შემაჯამებელი ტურნირის გამარჯვებული 19 წლის მირა ანდრეევა გახდა. ფინალურ დაპირისპირებაში მან უკრაინელ ელინა სვიტოლინას ორ სეტში, ანგარიშით 7:5, 6:3 სძლია და 1500 უმნიშვნელოვანესი სარეიტინგო ქულა გამოიმუშავა.
შეხვედრა საკმაოდ დაძაბული გამოდგა. პირველ სეტში ჩოგბურთელებს საკუთარ ჩაწოდებაზე თამაში უჭირდათ და არაერთი ბრეიკი ვიხილეთ, თუმცა გადამწყვეტ მომენტში ანდრეევამ მეტი სიზუსტე გამოიჩინა. მეორე სეტის დასაწყისშიც, გაცვლილი ბრეიკების შემდეგ, მირამ თამაშის ხარისხი კიდევ უფრო გააუმჯობესა, საკუთარ ჩაწოდებაზე შეცდომა აღარ დაუშვა და მეტოქეს ორი გეიმი აართვა, რითაც მატჩი ლოგიკურ გამარჯვებამდე მიიყვანა.
ახალგაზრდა ჩოგბურთელის ანგარიშზე უკვე 2 უდიდესი ტიტულია - როლან გაროსი და წლის შემაჯამებელი ტურნირი. ამ გამარჯვების წყალობით, იგი WTA-ს რეიტინგში 7806 ქულით მეორე პოზიციაზე გადავიდა და ლიდერ ელენა რიბაკინას მხოლოდ 293 ქულით ჩამორჩება. აღსანიშნავია, რომ მომავალ ავსტრალიის ღია პირველობაზე ანდრეევას მსოფლიოს პირველ ჩოგნად გახდომის რეალური შანსი აქვს, რადგან ტურნირის მოქმედ ჩემპიონს, რიბაკინას 2000 ქულა ექნება დასაცავი.