VIDEO: ქალთა შემაჯამებელი ტურნირის ფინალური წყვილი გაირკვა

ქალთა შემაჯამებელი ტურნირის ნახევარფინალურ შეხვედრებში მე-3 სეტის ჩატარება საჭირო არ გამხდარა.

მირა ანდრეევამ და ელინა სვიტოლინამ მეტოქეები 2 სეტში დაამარცხეს და WTA Finals-ის ფინალში გავიდნენ.

ფინალში გასამართი დაპირისპირება გულშემატკივრებისთვის ნაცნობი იქნება, რადგან ანდრეევა და სვიტოლინა ტურნირის პირველივე შეხვედრაში დაუპირისპირდნენ ერთმანეთს.

მაშინ ანდრეევამ 6:4, 6:0 გაიმარჯვა. ახლა სვიტოლინას რევანშის აღების შესაძლებლობა ექნება, თანაც ამჯერად ტურნირის ჩემპიონის ტიტული გათამაშდება.

პირველ ნახევარფინალში ჯესიკა პეგულა მე-2 სეტში 3:1-ს იგებდა, თუმცა ანდრეევამ მომდევნო 6 გეიმიდან 5 მოიგო და შეხვედრა 2 სეტში, 6:3, 6:4 დაასრულა.

ანდრეევა ტურნირზე სადებიუტო გამოსვლისას ფინალში გავიდა და მთელი კვირის განმავლობაში ჯერ ერთი სეტიც არ წაუგია.

რაც შეეხება ელინა სვიტოლინას, უკრაინელ ჩოგბურთელს ნახევარფინალამდე მისასვლელად წინა 2 შეხვედრაში 3-3 სეტის ჩატარება დასჭირდა.

თუმცა ამჯერად სვიტოლინამ ლინდა ნოსკოვას წინააღმდეგ დამაჯერებლად ითამაშა. პირველ სეტში მეტოქის მოწოდება 3-ჯერ მოიგო, ხოლო მე-2 სეტში სწრაფად დაწინაურდა 5:0 და საბოლოოდ შეხვედრა ანგარიშით 6:2, 6:1 დაასრულა.

სვიტოლინა სეზონის შემაჯამებელ ტურნირზე კარიერაში მესამედ ასპარეზობს და სამივე შემთხვევაში ფინალში გავიდა. მას შესაძლებლობა ექნება, ეს პრესტიჟული ტურნირი კარიერაში მეორედ მოიგოს.

ანდრეევასა და სვიტოლინას მატჩი დღეს 00:00 საათზე დაიწყება.