უეფას ჩემპიონთა ლიგის საკვალიფიკაციო ეტაპის პლეი-ოფის საპასუხო მატჩში ლიონის მოედანზე სკანდალური დაპირისპირება მოხდა.
ლიონისა და ფენერბაჰჩეს მატჩის შემდეგ მომხდარი ინციდენტის ახალი კადრები გავრცელდა.
იმ დროს, როდესაც თურქული გუნდის ნახევარმცველი, მატეო გენდუზი, გოლს ზეიმობდა, ლიონის ფეხბურთელები მას თავს დაესხნენ.
ამ მომენტში ფენერბაჰჩეს მოთამაშეები თანაგუნდელ გენდუზის თითქმის დაცვის თანამშრომლებივით იცავდნენ. გასასვლელი გვირაბისკენ მიმავალ გენდუზის ერთ-ერთი პირი ნახტომში ფეხით დაესხა თავს.
გახურების დროს, როდესაც ლიონის გულშემატკივრები თავიანთ სიმღერას მღეროდნენ, გენდუზიმ მათ შუა თითი აჩვენა.
მას შემდეგ კი, რაც ფენერბაჰჩემ ლიონი ჩემპიონთა ლიგიდან გამოთიშა, გენდუზიმ მასპინძელი გუნდის ქომაგების პროვოცირება კვლავ მოახდინა.
ლიონის გულშემატკივრებმა მოედანზე შეჭრა სცადეს, ხოლო გუნდის ფეხბურთელები გენდუზისკენ გაემართნენ, რათა მის საქციელზე პასუხი მოეთხოვათ.
ერთ-ერთმა გულშემატკივარმა გენდუზის მხარეს, გვირაბთან ახლოს შეღწევა მოახერხა და მასთან ხელჩართულ ჩხუბში ჩაერთო.
სწორედ ამან გამოიწვია სრული ქაოსი ლიონისა და ფენერბაჰჩეს წარმომადგენლებს შორის, გვირაბში მასობრივი ჩხუბი დაიწყო და მონაწილეები ერთმანეთს მუშტებს ურტყამდნენ.
მომხდარზე კომენტარი თავად ფრანგმა ფეხბურთელმა გააკეთა:
„პატივისცემა? ჩემთან დაპირისპირება გინდათ? მაშინ იცოდეთ, რომ ეს ორმხრივია!
90 წუთის განმავლობაში, უფრო მეტხანსაც კი, დედაჩემსა და ჩემს ოჯახს შეურაცხყოფას აყენებდნენ, ამის შემდეგ კი ჩვენ ისე აღნიშვნის უფლებაც არ გვაქვს, როგორც გვინდა... ეს სამარცხვინოდ მიმაჩნია.
წარმოიდგინეთ, 60 000 ადამიანი შენს ოჯახს, დედას, შვილებს შეურაცხყოფას აყენებს და არავინ, მსაჯებიც კი, არ ეუბნება მათ, რომ გაჩერდნენ!
ეს ძალიან მძიმედ მოქმედებს... ვიცი, რომ საფრანგეთში, როდესაც მსგავსი რამ ხდება, რაღაც მომენტში თამაშს აჩერებენ და გულშემატკივრებს მოუწოდებენ, რომ შეწყვიტონ.“
მატეო გენდუზი 2022-24 წლებში მარსელში თამაშობდა და ლიონის გულშემატკივრებთან მისი ცუდი ურთიერთობაც აქედან გამომდინარეობს.
ფენერბაჰჩემ ორი მატჩის ჯამში ლიონი დაამარცხა და ჩემპიონთა ლიგაზე 2008/09 წლების სეზონის შემდეგ პირველად დაბრუნდა.
