VIDEO: კონფერენციის ლიდერს სტუმრად მოუგეს - გოგას გუნდი მაგარ სვლაზეა

გოგა ბითაძის ორლანდო მეჯიქმა აღმოსავლეთ კონფერენციის ლიდერ დეტროიტ პისტონსს სტუმრად მოუგო და ბოლო 10 მატჩში მე-8 გამარჯვება მოიპოვა.

ორლანდოელებმა ბოლო მეოთხედის საწყის წუთებში 10-ქულიანი უპირატესობაც მოიპოვეს, თუმცა პისტონსმა სხვაობა დაქაჩა და მატჩის დასკვნითი წუთები ქულა-ქულაში წავიდა.

საბოლოოდ, სტუმრებმა 112:109 მოიგეს, რაშიც უმთავრესი წვლილი დესმონდ ბეინს ჰქონდა - 37 ქულა, 8 მოხსნა, 2 ასისტი, მორიგი კარგი შეხვედრა ჩაატარა ფრანც ვაგნერმაც - 21 ქულა, 7 მოხსნა, 1 ასისტი. 

მატჩის მთავარი სთარი კი პისტონსის ლიდერი კეიდ კანინგემი გახლდათ, რომელმაც სუპერ სოლიდური სამმაგი დუბლი მიითვალა - 39 ქულა, 13 მოხსნა, 11 ასისტი.

რაც შეეხება გოგას, მან 14:18 წუთი ითამაშა - 4 ქულა და 3 მოხსნა. 2-დან 2 ორქულიანი ჩააგდო და არც სამქულიანი უსვრია და არც საჯარიმოს ხაზზე დამდგარა. 1-1 ჩაჭრა და ბლოკიც ჰქონდა.

დეტროიტმა, ბოსტონში მარცხის შემდეგ, ზედიზედ მეორე შეხვედრა წააგო და სანდრო მამუკელაშვილის ტორონტოს 1 მოგებამდე მიახლოვების საშუალება მისცა - პისტონსს 15 გამარჯვება აქვს, რეპტორსს - 14. ორლანდომ კი 12 მოგებას მოუყარა თავი და ამავე კონფერენციის მე-5 ადგილზეა.

გოგას გუნდი, 2 დეკემბრის 04:30 საათზე, ჩიკაგო ბულსს (9-9 მოგება-წაგება) უმასპინძლებს.