VIDEO: ლაცაბიძის სადებიუტო გოლი კარიერაში - დინამო თბილისმა გარეჯი დაამარცხა

ეროვნული ლიგის 32-ე ტურში, დინამო თბილისმა ნომინალურად სტუმრად საგარეჯოს გარეჯთან ითამაშა და 1:0 გაიმარჯვა. ნომინალურად, რადგან თამაში თბილისში, მიხეილ მესხი 2-ზე ჩატარდა.

მატჩის ერთადერთი გოლი დინამოელთა მცველმა ლუკა ლაცაბიძემ შეაგდო - კუთხურის შემდეგ ბურთს უკანა ძელთან კარგად დახვდა და დაუცველ კარში გადაგზავნა. 21 წლის უკანახაზელისთვის პროფესიონალურ კარიერაში პირველი გოლია.

საგოლე პასი მიითვალა ცვლილებაზე შესულმა ირაკლი სირაძემ, რომლისთვისაც სეზონში მე-5 საგოლე მოქმედებაა - 4 გოლი და 1 ასისტი.

აღსანიშნავია, რომ დინამო თბილისმა გარეჯს სეზონში მესამედ მოუგო - კიდევ ერთი ურთიერთშეხვედრა ნულოვანი ფრით დასრულდა.

32 ტურის შემდეგ, დედაქალაქელებმა 55 ქულა მოაგროვეს და მე-4 ადგილოსან ტორპედოს, რომელიც თავის შეხვედრას ხვალ დინამო ბათუმთან ჩაატარებს, 5 ქულით დაშორდნენ. გარეჯი, 33 ქულით, მე-8 ადგილზეა და პლეი-აუტის ზონაში იმყოფება.

დინამო თბილისი შემდეგ ტურში გაგრას უმასპინძლებს - 21 ნოემბერს, ხოლო გარეჯს იმავე დღეს, ასევე ნომინალური მასპინძლის სტატუსით, თელავთან კახური დერბი აქვს.