VIDEO: მატჩის MVP - შენგელიამ მაკაბისთან მაგარი თამაში ჩაატარა

თორნიკე შენგელიამ, ევროლიგის მე-20 ტურში, მაკაბი თელ-ავივის წინააღმდეგ ტოპ მატჩი ჩაატარა და ბარსელონას გამარჯვებაში (93:83) მთავარი როლი ჰქონდა.

ქართველი, 3-კვირიანი ტრავმის შემდეგ, პარკეტზე 2 იანვარს დაბრუნდა და მას შემდეგ მხოლოდ მე-3 შეხვედრა ჩაატარა. ბარსას ძირითადში არ ყოფილა და 22 ქულის, 2 მოხსნისა და 4 ასისტის მოსაგროვებლად, 25:12 წუთი ეყო. 9-დან 7 სროლა გამოიყენა - 7-დან 6 ორქულიანი და 2-დან 1 სამქულიანი, ასევე 7-დან 7 საჯარიმო ჩააგდო.

ეფექტიანობის ინდექსის მიხედვით, მისი მაჩვენებელი 27 გახლდათ, რაც ორივე გუნდში საუკეთესო იყო და მისთვისაც ევროლიგის ამ სეზონში ყველაზე მაღალი შედეგია.

ქულების მხრივ, წლევანდელ სეზონში ჩატარებული 27 მატჩიდან ამაზე უფრო კარგი მაჩვენებელი ერთადერთხელ ჰქონდა - 31 ოქტომბერს, ევროლიგის ეგიდით, ბელგრადის პარტიზანთან (24 ქულა, 5 მოხსნა, 5 ასისტი).

ბარსამ წელი 3 გამარჯვებით გახსნა, თუმცა უშუალოდ ევროლიგაზე 2 ტურის შემდეგ პირველად მოიგო - ჯამში 13 გამარჯვება აქვს და ლიდერებს 1-1 მოგებით ჩამორჩება.

კატალონიელები, 9 იანვარს, ბელგრადის პარტიზანს უკვე საკუთარ მოედანზე მიიღებენ.