VIDEO: პორტლენდი დაამარცხეს - ტორონტომ კონფერენციის მე-2 ადგილი დაიბრუნა

სანდრო მამუკელაშვილის ტორონტო რეპტორსმა 2-მატჩიანი წაგებათა სერია შეწყვიტა - შინ პორტლენდ ტრეილ ბლეიზერსს 121:118 მოუგო.

რეპტორსმა ბოლო მეოთხედი 13-ქულიანი უპირატესობით დაიწყო, თუმცა ბოლო წუთებზე ვითარება შედარებით დაიძაბა, მაგრამ არა ისე, რომ პორტლენდელები წინ გასულიყვნენ. მათი მაქსიმუმი ბოლო წუთზე 2 ქულაში შესვლა აღმოჩნდა.

მასპინძელთა მხრიდან, სკოტ ბარნსი (28 ქულა, 7 მოხსნა, 7 ასისტი), იმანუელ ქვიქლი (23 ქულა, 5 მოხსნა, 8 ასისტი) და ბრენდომ ინგრამი (21 ქულა, 6 მოხსნა, 3 ასისტი) გამოირჩნენ.

რაც შეეხება მამუს, მან 18:42 წუთი ითამაშა და საკუთარ გუნდს 6 ქულა, 7 მოხსნა და 2 ასისტი შესძინა. 3-დან 3 ორქულიანი, სამქულიანისა და საჯარიმოს სროლის შანსი თითო-თითოჯერ მიეცა, მაგრამ ვერც ერთი ჩააგდო. 1-1 ბლოკი და დაკარგვაც ჰქონდა.

შედეგად, დარკო რაიაკოვიჩის გუნდმა 22-დან მე-15 შეხვედრა მოიგო და აღმოსავლეთ კონფერენციის მე-2 ადგილი დაიბრუნა. 

ტორონტო მომდევნო თამაშს, 5 დეკემბრის 04:30 საათზე, დასავლეთ კონფერენციის მე-2 ადგილოსან ლოს ანჯელეს ლეიკერსთან ასევე თავის პარკეტზე გამართავს.