VIDEO: ქართული ბენეფისი - კვერნაძის სუპერ მატჩი იტალიის თასზე

იტალიის თასის 1/32 ფინალში ფროზინონე იუვე სტაბიას დაუპირისპირდა და 4-1 გაანადგურა.

მასპინძელთა სასტარტო შემადგენლობაში იყო გიორგი კვერნაძე, რომელმაც მატჩი სრულად ჩაატარა და შეხვედრის საუკეთესო მოთამაშეც გახდა.

ანგარიში მე-20 წუთზე სწორედ ქართველმა შემტევმა გახსნა, 29-ე წუთზე კი კვერნაძემ უკვე საგოლე გადაცემა მიითვალა და ფროზინონემ სხვაობა ორამდე გაზარდა.

პირველი ტაიმის ბოლომდე ქართველის გუნდმა კიდევ ერთი გოლის გატანა შეძლო და შესვენებაზე 3-0 ანგარიშით გავიდა.

71-ე წუთზე, როცა ანგარიში უკვე 3-1 იყო, გიორგი კვერნაძემ დუბლის შესრულება შეძლო და მატჩის საბოლოო ანგარიშიც დააფიქსირა.

ქართველი ფეხბურთელი დუბლითა და საგოლე პასით შეხვედრის MVP გახდა, ფროზინონე კი იტალიის თასის 1/16 ფინალში გავიდა, სადაც სასუოლოსა და ჩეზენას შორის გამარჯვებულს შეხვდება.