VIDEO: ქოჩორას ისევ არ უთამაშია - სპორტინგმა დრამატულად მოიგო
09 ნოე, 2025 · 0 წთ წასაკითხად
ლინკის დაკოპირება
-
Aa
+
ფონტის ზომა
გიორგი ქოჩორაშილს სპორტინგის მაისურით მინდორზე გასვლის საშუალება ზედიზედ მე-3 მატჩში არ მიეცა. რუი ბორჟესის გუნდმა სანტა კლარას სტუმრად 2:1 მოუგო.
დედაქალაქელები თავიდანვე ჩამორჩნენ, თუმცა პედრო გონსალვეშმა გაათანაბრა და ტაიმი 1:1 დასრულდა. მეორე ნახევრის დამატებულ, 91-ე წუთზე, სპორტინგს მაქსიმილიანო არაუხო გაუძევეს და დარჩენილ მცირე დროში მოგების შანსი კიდევ უფრო შეუმცირდა.
94-ე წუთზე, ლაინსმენმა კუთხური არასწორად დანიშნა - გამეორებაზე ნათლად გამოჩნდა, რომ ჯიოვანი ქენდას უბრალოდ ფეხი დაუცდა და ბურთი მეტოქესთან ახლოსაც არ მისულა, პირით ხაზს იქით ისე გადავარდა. სწორედ ამ კუთხურიდან, იმავე ქენდას მიერ მოწოდების შემდეგ, ლომების კაპიტანმა მორტენ ჰიულმანმა გამარჯვების გოლი შეაგდო და გუნდს რთული მატჩი მოაგებინა.
რუი ბორჟესი ქოჩორას უკვე მე-3 მატჩია სათადარიგოთა შორის ბოლომდე ტოვებს, ხოლო ოქტომბრის სანაკრებოს შემდეგ ჩატარებული 7-დან მხოლოდ 2 თამაშში მისცა დრო - თასზე ალვერკასთან 90 წუთით და ჩემპიონატში ტონდელასთან 5 წუთით.
გიოს მიმდინარე სეზონში 11 საკლუბო შეხვედრაში აქვს მონაწილეობა მიღებული, თუმცა ფაქტია, ნოემბრის სანაკრებოს პრაქტიკულად სათამაშო პრაქტიკის გარეშე ხვდება.
ლიგა პორტუგალის 11 ტურის შემდეგ, სპორტინგმა 28 ქულა მოაგროვა და გაუთანაბრდა ლიდერ პორტუს, რომელიც დღეს ოთო მამაგეიშვილის ფამალიკაუს ესტუმრება. ლომები მომდევნო ტურში მე-14 ადგილოსან ეშტრელას მიიღებენ.
