VIDEO: ტორონტოს სასტარტოში პირველად ითამაშა - მამუს გუნდმა მორიგი მატჩი მოიგო

სანდრო მამუკელაშვილის ტორონტო რეპტორსმა, ბრუკლინ ნეთსთან გამარჯვების (119:109) შედეგად, NBA-ის აღმოსავლეთ კონფერენციის მე-2 ადგილი გაიმყარა. ქართველმა რეპტორსის სასტარტო ხუთეულში პირველად ითამაშა.

კანადელები კონფერენციის ერთ-ერთ აუტსაიდერთან (3 მოგება და 13 წაგება) უპირატესობას მთელი მატჩის განმავლობაში ფლობდნენ და ანგარიშიც პირველივე მეოთხედიდან კომფორტული სხვაობებით წაიყვანეს. შესაბამისად, დარკო რაიაკოვიჩმა ლიდერებს ჩვეულებრივზე მეტი დასასვენებელი წუთები მისცა.

მაგალითად, დამაჯერებელი გამარჯვების მიუხედავად, ტორონტოელთაგან ყველაზე შედეგიანი 17-ქულიანი სკოტ ბარნსი გახდა, არ ჯეი ბერეტმა და ჯე'კობი უოლტერმა (სეზონის პირადი ქულების რეკორდი ჰქონდა) 16-16 ქულა მიითვალეს, ბრენდონ ინგრამმა - 14, ხოლო იმანუელ ქუიქლიმ - 13.

საიუბილეო დღე გამოუვიდა ინგრამს, რომელმაც NBA-ში 10 000-ქულიან ნიშნულს სწორედ ამ შეხვედრისას გადააჭარბა.

აღსანიშნავია, რომ გუნდის ერთ-ერთმა ლიდერმა არ ჯეი ბერეტმა, მე-3 მეოთხედის შუაში, კუნთის დაჭიმულობის გამო, სათამაშო მოედანი დატოვა. მისი მდგომარეობის შესახებ ტესტის შემდეგ უფრო ზუსტად გვეცოდინება, იქამდე კი ხვალ გამთენიისას კლივლენდ კავალიერსთან თამაში საეჭვოა.

რაც შეეხება მამუს, რეპტორსის სასტარტო ხუთეულში პირველად მოხვდა, 26:33 წუთი ითამაშა და 12 ქულა, 4 მოხსნა და 2 ასისტი ჩაიწერა აქტივში. თითო-თითო ჩაჭრა და დაკარგვაც ჰქონდა.

დარკო რაიაკოვიჩის გუნდი შესანიშნავ სვლაზეა და, სეზონის საწყისი 5-დან 4 თამაშის წაგების შემდეგ, ბოლო 12-დან 11 შეხვედრა მოიგო - 12:5-ზე ბალანსით, აღმოსავლეთ კონფერენციის მე-2 პოზიციაზეა. ლიდერ დეტროიტს 14:2-ზე აქვს.

ტორონტო მომდევნო თამაშს ისევ საკუთარ დარბაზში, 25 ნოემბრის 04:00 საათიდან, ერთ-ერთ კონკურენტ და კონფერენციაში მასზე 1 ადგილით ქვემოთ მყოფ კლივლენდ კავალიერსის წინააღმდეგ გამართავს.