VIDEO: ვაწაძემ ისევ შეაგდო - დინამომ რუსთავს 7-მატჩიანი სერია შეაწყვეტინა

ეროვნული ლიგის მე-12 ტურში, დინამო თბილისმა რუსთავს სტუმრად მოუგო და 7-მატჩიანი დაუმარცხებელი სერია შეუწყვიტა.

შეხვედრაში ანგარიში 43-ე წამზე გაიხსნა, როცა ნიკა ნინუას კუთხურის შემდეგ აბდულაიე იორომ თბილისელები დააწინაურა. დინამოელთაგან მეორე გოლი შეაგდო რუი მონტეირუმ, რომელმაც სეზონში თავი მესამედ გამოიჩინა (ამ გოლისასაც ასისტი ნინუას ჰქონდა). რუსთავმა კი პირველსავე ტაიმში ორჯერ გაათანაბრა - ნაკანომ და ჯექსონ კენიომ სეზონში სადებიუტო გოლები მიითვალეს.

დინამოს გამარჯვება მათე ვაწაძემ მოუტანა - 37 წლის თავდამსხმელმა გადმოვარდნილ ბურთზე ეფექტურად დაარტყა და ბოლო 4 ტურში მე-4 გოლი გაიტანა. ვაწაძეს სეზონში სწორედ ეს 4 გოლი აქვს - ოთხივე თემურ ქეცბაიას ხელმძღვანელობით.

შედეგად, რუსთავმა 3 აპრილისა და 7 მატჩის შემდეგ პირველად წააგო, დინამო თბილისმა კი ქეცბაიას დანიშვნის შემდეგ 4 ტურში 10 ქულა აიღო - იქამდე 8 ტურში 8 ქულა ჰქონდა.

ეროვნულ ლიგაში, 12 ტურის სრულად ჩატარების შემდეგ, ასეთი მდგომარეობაა:

1. იბერია 1999 (თბილისი) - 24 ქულა;

2. რუსთავი (რუსთავი) - 19 ქულა;

3. დილა (გორი) - 19 ქულა;

4. დინამო (თბილისი) - 18 ქულა;

5. ტორპედო (ქუთაისი) - 17 ქულა;

6. სპაერი (თბილისი) - 15 ქულა;

7. დინამო (ბათუმი) - 14 ქულა;

8. სამგურალი (წყალტუბო) - 14 ქულა;

9. გაგრა (თბილისი) - 10 ქულა;

10. მეშახტე (ტყიბული) - 10 ქულა.

შემდეგი ტურის მატჩს ორივე გუნდი 16 მაისს ითამაშებს - დინამო თბილისი ლიდერ იბერია 1999-ს უმასპინძლებს, ხოლო რუსთავი გაგრას ესტუმრება.