VIDEO: ზედიზედ მე-9 მოგება - ტორონტო კონფერენციის ლიდერს 1 მოგებამდე მიუახლოვდა

სანდრო მამუკელაშვილის ტორონტო რეპტორსმა NBA-ის რეგულარულში ზედიზედ მე-9 მატჩი მოიგო. კანადელებმა თავიანთ პარკეტზე ინდიანა პეისერსს დრამატულად მოუგეს - 97:95.

მატჩის ბოლოსწინა შეტევისას, ანგარიში 95:95 იყო, ბრენდონ ინგრამმა ორქულიანი ჩააგდო და პეისერსს შეტევისთვის 0.6 წამი დაუტოვა - სროლა მოასწრეს, თუმცა სამქულიანი ზუსტი არ აღმოჩნდა და გამარჯვება რეპტორსს დარჩა.

შეხვედრის ყველაზე შედეგიანი მოთამაშე სწორედ ინგრამი (26 ქულა, 8 მოხსნა) გახლდათ, სკოტ ბარნსმა ორმაგი დუბლი მიითვალა - 24 ქულა, 10 მოხსნა, 4 ასისტი, ხოლო იმანუელ ქვიქლიმ გუნდს 15 ქულა, 5 მოხსნა და 6 ასისტი შეჰმატა.

რაც შეეხება სანდროს, მან პარკეტზე 16:27 წუთი გაატარა - 7 ქულა, 3 მოხსნა. 8-დან 3 სროლა ჩააგდო - 6-დან 3 ორქულიანი, 2-ვე სამქულიანი გააფუჭა, რასაც 1-დან 1 საჯარიმოც მიამატა. ჩაჭრა, ბლოკი ან დაკარგვა არ ჰქონია.

დარკო რაიაკოვიჩის გუნდი მაგარ ფორმაშია და ზედიზედ მე-9 შეხვედრა მოიგო, ბოლო 14-დან კი 13 დაასრულა თავის სასარგებლოდ.

შედეგად, რეპტორსმა აღმოსავლეთ კონფერენციის ლიდერ დეტროიტის ბოსტონში მარცხით (114:117) ისარგებლა და 1 მოგებამდე მიუახლოვდა.

სანდროს გუნდი, 30 ნოემბრის 03:00 საათზე, კონფერენციის მე-12 ადგილოსან შარლოტ ჰორნეთსს ესტუმრება, მეორე დღეს კი ნიუ იორკს ნიქსის წინააღმდეგ ასევე გასვლაზე ითამაშებს.