ვინ არის ენრიკე რიკელმე - კაცი, რომელსაც პერესი არჩევნებში იწვევს

ფლორენტინო პერესის სკანდალური პრესკონფერენციის ერთ-ერთი ყველაზე მოულოდნელი მომენტი კონკრეტული ადამიანის მისამართით გაჟღერებული გამოწვევა იყო.

პრეზიდენტმა გამოიწვია ბიზნესმენი, რომელსაც მისი ჩანაცვლება სურს.

„მექსიკური აქცენტი“ და პერესის ირონია

პერესმა პრესკონფერენციაზე პირდაპირ მიმართა ოპონენტს, რომლის ვინაობაც არ დაუკონკრეტებია, თუმცა მინიშნებები საკმარისზე მეტი იყო:

წელს ვაცხადებ კანდიდატურების მიღებას, რათა იყვნენ კანდიდატები. ის ჯენტლმენი, რომელიც ენერგეტიკულ კომპანიებთან საუბრობს და სამხრეთამერიკული, მექსიკური აქცენტი აქვს, კეთილი ინებოს და გამოვიდეს არჩევნებზე. ამბობენ, რომ ჩვენ ცუდები ვართ, რომ აქ დიქტატურაა. ჰოდა, დადგეს ეს ჯენტლმენი და ნებისმიერი სხვა, ვისაც სურს

ბიზნესმენი, რომელზეც პერესი საუბრობდა, ენრიკე რიკელმეა, კომპანია Cox Energy-ს 37 წლის აღმასრულებელი დირექტორი. მას მართლაც აქვს მჭიდრო კავშირი ლათინურ ამერიკასთან, სადაც მისი მზის ენერგიის ბიზნესი ოპერირებს.

ვინ არის რიკელმე?

რიკელმე ალიკანტეში დაბადებული მეწარმეა, რომელიც რეალის წევრი 20 წელზე მეტია (რაც პრეზიდენტობის კანდიდატისთვის აუცილებელი პირობაა). მისი კომპანია რაფაელ ნადალის გუნდის, Team Rafa-ს სპონსორია. რიკელმე ჯერ კიდევ 2021 წელს აპირებდა პერესისთვის კონკურენციის გაწევას, თუმცა მაშინ საბოლოო ნაბიჯი არ გადაუდგამს.

ახლა, როცა პერესი მედიასთან და კრიტიკოსებთან ღია ომშია, ის თავად იწვევს რიკელმეს საარჩევნო ბრძოლაში, რათა დემოკრატიულობა დაამტკიცოს. თუმცა, კლუბში არსებული ქაოსის ფონზე, უცნობია, რამდენად გაბედავს ახალგაზრდა ბიზნესმენი მადრიდული იმპერატორის წინააღმდეგ წასვლას.

,,ახალ არჩევნებს ვნიშნავ" - ფლორენტინო პერესის სრული პრესკონფერენცია