ვინ გახდება ლა ლიგის სეზონის საუკეთესო მოთამაშე?

ესპანური ფეხბურთის ორი წამყვანი კლუბის შემტევები ლა ლიგის 2025/26 წლების სეზონის საუკეთესო ფეხბურთელის ნომინაციაზე არიან წარდგენილნი.

ჩემპიონ ბარსელონას, როგორც მოსალოდნელი იყო, წარმოადგენს ფლანგის ვუნდერკინდი ლამინ იამალი. ლამინმა ბარსას მარჯვენა ფლანგზე მორიგი შთამბეჭდავი სეზონი ჩაატარა და ესპანეთის უმაღლეს დივიზიონში ჩატარებულ 28 მატჩში 28 საგოლე მოქმედება დააგროვა.

ლა ლიგის გასული სეზონის საუკეთესოს ტიტულისთვის ბრძოლაში 18 წლის ფეხბურთელს უერთდება მადრიდის რეალის თავდამსხმელი კილიან მბაპე. მიუხედავად მისი სეზონის ქაოსური ხასიათისა, ფრანგმა მბაპემ ლა ლიგაში 25 გოლის გატანა მოახერხა და ზედიზედ მეორედ მოიპოვა პიჩიჩის პრიზი.

სიაში ასევე მოხვდა წლის მეორე საუკეთესო ბომბარდირი ვედატ მურიქი, რომელმაც ლა ლიგიდან გავარდნილ მალიორკაში საოცარი შედეგი დააფიქსირა და მეტოქეთა კარში 23 გოლი გაიტანა. ნომინანტთა სიას ასრულებენ რეალ ბეტისის ნახევარდაცვის გამორჩეული წევრი პაბლო ფორნალსი და ვილიარეალის ფლანგის შემტევი ნიკოლა პეპე.