შვეიცარიაში ქალთა ევროპის ჩემპიონატის ფინალი გაიმართა.
ფინალურ მატჩში ერთმანეთს ინგლისისა და ესპანეთის ნაკრებები დაუპირისპირდნენ.
ანგარიში 25-ე წუთზე ესპანელთა მხრიდან მარიონა კალდენტეიმ გახსნა და თავის გუნდს პირველი ტაიმი 0-1 მოაგებინა. 57-ე წუთზე ალესია რუსომ ანგარიში გაათანაბრა, შეხვედრის ბოლომდე კი ანგარიში აღარ შეცვლილა და დამატებითი ტაიმები გახდა საჭირო.
გამარჯვებული დამატებით 30 წუთშიც ვერ გამოვლინდა და პენალტების სერია დაინიშნა. თერთმეტმეტრიანებში უკეთესები ინგლისელები აღმოჩნდნენ და 3-1 იმარჯვეს.
პენალტები ზუსტად ალექს გრინვუდმა, ნიამ ჩარლზმა და ქლო კელიმ შეასრულეს, ესპანელთა მხრიდან კი მხოლოდ გუტიერეს გუიხარომ შეძლო გოლის გატანა.
პენალტების სერიის გმირი ინგლისელთა მეკარე ჰანა ჰემპტონი აღმოჩნდა, რომელმაც 2 თერთმეტმეტრიანი მოიგერია და თავის გუნდს გამარჯვებაში დაეხმარა.
ინგლისის ქალთა ნაკრები ევროპის ჩემპიონი ზედიზედ მეორედ გახდა.
ტურნირის საუკეთესო ბომბარდირი ესპანელი ესტერ გონსალეს როდრიგესი გახდა 4 გოლით, საუკეთესო მოთამაშის ჯილდო კი აიტანა ბონმატიმ მიიღო.
