სამედ ბაზდარი იბერია 1999-თან მატჩის წინ ოპტიმისტურად არის განწყობილი.
ბელგიის ჟუპილერ პრო ლიგაში განცდილი მარცხებისა და მეხელენთან დრამატული წაგების (3:4) შემდეგ, სენტ-ტრუიდენში უეფა-ს კონფერენს ლიგის ძირითადი ეტაპის სადებიუტო შეხვედრას დიდი ენთუზიაზმითა და რეაბილიტაციის სურვილით ელოდებიან.
ბელგიური კლუბის 22 წლის სერბი თავდამსხმელი სამედ ბაზდარი, რომელსაც გუნდში ყველაზე დიდი ევროპული გამოცდილება აქვს, აცხადებს, რომ შიდა ჩემპიონატში არსებული კრიზისის მიუხედავად, ევროთასებზე სულ სხვა განწყობით გავლენ:
გასულ დღეებში გუნდში გულდაწყვეტა სუფევდა, თუმცა ეს სულ სხვა ტურნირია. კლუბს და ფეხბურთელებს ევროპაში საკუთარი შესაძლებლობების ჩვენება სურთ, ასე რომ, ახლა სწორედ ის მომენტია. იბერიასთან ფავორიტები ვართ, საკუთარ კედლებში ვთამაშობთ და სწრაფი გადართვა მოგვეთხოვება.
ამასთან, სერბმა ფორვარდმა გაამხილა, რომ თბილისურ კლუბზე ინფორმაცია პოლონური იაგიელონიას ყოფილი თანაგუნდელებისგან მოიპოვა, რომლებიც გასულ ზაფხულს ევროპის ლიგის საკვალიფიკაციო ეტაპზე დაუპირისპირდნენ იბერიას:
მათ მითხრეს, რომ იბერია ცუდი გუნდი ნამდვილად არ არის და ფეხბურთის თამაში უყვარს. პრინციპში, ასეთი სათამაშო სტილი ჩვენც უნდა გვაწყობდეს. ფეხბურთში ყველაფერი ხდება, მაგრამ იმას ვერ დავმალავთ, რომ ფავორიტები ვართ.
