VIDEO: გრასოს ბრუტალური ფინიში და ადესანიას მორიგი მარცხი

სიეტლში UFC-ის მორიგი საბრძოლო საღამო გაიმართა.

ღონისძიების მთავარ ბრძოლაში საშუალო წონის დაპირისპირება შედგა, სადაც ჯო პაიფერმა ისრაელ ადესანიას მე-2 რაუნდის ტექნიკური ნოკაუტით მოუგო.

ყოფილ ჩემპიონ ადესანიას უკვე 3 წელია ბრძოლა არ მოუგია, მან ბოლო 6 ბრძოლიდან 5 წააგო, ახლა კი 4-ბრძოლიანი წაგებათა სერია აქვს. თუმცა ბრძოლის შემდეგ დანიელ კორმიესთან ინტერვიუში ადესანიამ განაცხადა, რომ ის კარიერის დასრულებას არ აპირებს და ბრძოლას გააგრძელებს.

ღონისძიების თანამთავარ ბრძოლაში კი ქალთა უმსუბუქესი წონის დაპირისპირება ვიხილეთ, სადაც ალექსა გრასომ მეისი ბარბერი პირველ რაუნდში ბრუტალურად გათიშა.

გრასომ მეტოქე ჯერ ნოკაუტში ჩააგდო, შემდეგ კი ისე სწრაფად მოახრჩო, რომ მსაჯმა მოძრაობებს შორის რეაგირება ვერ მოასწრო და ბრძოლა მხოლოდ ამის შემდეგ გააჩერა.

ალექსა გრასოს ბოლო გამარჯვება 3 წლის წინ იყო, როცა მან სენსაციურად ვალენტინა შევჩენკო სატიტულო ბრძოლაში დაამარცხა, ახლა კი მან 3-ბრძოლიანი მოუგებელი სერია დაასრულა და დაამარცხა ის ბარბერი, რომელსაც 2021 წლის შემდეგ ზედიზედ 7 ბრძოლა ჰქონდა მოგებული.

მთავარი ქარდის სხვა ბრძოლებში მაიკლ კიეზამ ნიკო პრაისს პირველი რაუნდის საბმიშენით სძლია, ლერიან დუგლასმა ჯულიან ეროსას პირველი რაუნდის ტექნიკური ნოკაუტით მოუგო, იუსრი ბელგარუიმ მანსურ აბდულ-მალიკს მე-3 რაუნდის ტექნიკური ნოკაუტით აჯობა, ტერანს მაკკინიმ კი 24 წამში დაუმთავრა ბრძოლა კაილ ნელსონს.