VIDEO: იამალის პირველი ჰეთ-თრიქი - ბარსელონამ ვილიარეალი მარტივად დაამარცხა
3 სთ წინ · 0 წთ წასაკითხად
-
Aa
+
ფონტის ზომა
ესპანეთის ლა ლიგის 26-ე ტურში ბარსელონამ კამპ ნოუზე ვილიარეალს უმასპინძლა.
სასტარტო შემადგენლობაში იყო გიორგი მიქაუტაძე, რომელმაც მატჩი სრულად ჩაატარა, თუმცა საგოლე შანსი არ მისცემია.
კატალონიელებმა უპირატესობა პირველივე ტაიმში მოიპოვეს. 28-ე წუთზე პაპე გეიეს შეცდომა არ აპატიეს და ლამინ იამალმა ანგარიში გახსნა.
37-ე წუთზე ახალგაზრდა ესპანელი მარჯვენა ფლანგიდან საჯარიმოში ორი კაცის ჩამოშორებით შეიჭრა და მეკარისგან შორეულ კუთხეში შესრულებული ბრწყინვალე დარტყმით დუბლი შეასრულა.
მეორე ტაიმის სტარტზე, კონკრეტულად 49-ე წუთზე პაპე გეიემ შეცდომა გამოასწორა და ერთი ბურთი გაქვითა, თუმცა სტუმრებმა თამაშში დაბრუნება ვერ მოახერხეს.
69-ე წუთზე ლამინ იამალმა პედრის შესანიშნავი პასის შემდეგ კიდევ ერთი გოლი გაიტანა და კარიერაში პირველი ჰეთ-თრიქი შეასრულა.
მატჩის კომპენსირებულ დროში კი შეცვლაზე შემოსულმა რობერტ ლევანდოვსკიმ ჟულ კუნდეს პასის შემდეგ ცარიელ კარში შეაგორა ბურთი და მატჩის საბოლოო ანგარიში 4-1 დააფიქსირა.
ბარსელონამ ამ მოგებით 64 ქულა დააგროვა და რეალის ხეტაფესთან მატჩის შედეგის მიუხედავად ამ ტურის შემდეგ კვლავ ცხრილის ლიდერი იქნება. ვილიარეალი კი 51 ქულით მე-3 ადგილზე რჩება, ხოლო ატლეტიკოს შანსი აქვს ოვიედოსთან მოგებით ყვითელ წყალქვეშა ნავს გაუთანაბრდეს.
