ბარსელონას დრამატული გამოთიშვა ჩემპიონთა ლიგიდან დიდ სკანდალში გადაიზარდა და დაძაბულობამ მოედნის ფარგლებს გარეთაც გადაინაცვლა.
ბარსელონა უეფასგან განმარტებებს ითხოვს: ლაპორტა დათმობას არ აპირებს
კლუბის პრეზიდენტმა ჟოან ლაპორტამ საქმე საკუთარ თავზე აიღო და პირდაპირ ალექსანდერ ჩეფერინს დაუკავშირდა, რათა ატლეტიკოსთან მეოთხედფინალურ მატჩში მსაჯების გადაწყვეტილებები გაეპროტესტებინა.
ორმატჩიანი დუელი, რომელიც ბარსელონასთვის იმედგაცრუებით დასრულდა, არაერთმა სადავო ეპიზოდმა დაჩრდილა. ლაპორტამ თავისი უკმაყოფილება საჯაროდაც გამოხატა.
როგორც ირკვევა, ლაპორტამ უეფას ხელმძღვანელობასთან გაუმჯობესებული ურთიერთობა თავის სასარგებლოდ გამოიყენა და ჩეფერინს გაესაუბრა. საქმე მხოლოდ სატელეფონო ზარებით არ შემოფარგლულა. მეტროპოლიტანოზე გამართული მატჩის შესვენებისას, ლაპორტა უეფას გენერალურ მდივანს მიუახლოვდა და მსაჯ კლემან ტიურპენის ქმედებები გააპროტესტა.
ბარსელონას ხელმძღვანელმა რამდენიმე საკვანძო მომენტზე გაამახვილა ყურადღება: დაუნიშნავი პენალტი დანი ოლმოზე და ხუან მუსოს უხეშობა ფერმინ ლოპესის წინააღმდეგ. ლაპორტამ ასევე გაიხსენა პირველი მატჩის ეპიზოდებიც - მარკ პუბილის ხელით თამაში, პაუ კუბარსის გაძევება და კოკეს დაუსჯელი ჯარიმები.
კლუბში მიიჩნევენ, რომ მსგავს ეპიზოდებზე სხვა მატჩებში პენალტები ინიშნებოდა, უეფას მიერ მათი ოფიციალური საჩივრის უგულებელყოფას კი მიუღებელს უწოდებენ.
