VIDEO: ოკლაჰომამ სერია დახურა, დენვერმა სხვაობა შეამცირა

NBA-ის პლეიოფში სერიის მე-4 მატჩი გაიმართა ფინიქს სანსსა და ოკლაჰომა სიტი თანდერს შორის, რომელიც ამ უკანასკნელის გამარჯვებით 122-131 დასრულდა.

გამარჯვებულ გუნდს შაი გილჯეს-ალექსანდერმა ულიდერა, რომელმაც 31 ქულა და 8 შედეგიანი გადაცემა დააგროვა, ფინიქსის მხრიდან კი საუკეთესო დევინ ბუკერი იყო 24 ქულით.

ამ მოგებით ოკლაჰომამ სერია დახურა და მეტოქე 4-0 გაანადგურა, შესაბამისად OKC დასავლეთ კონფერენციის ნახევარფინალშია.

მომდევნო ეტაპზე მოქმედი ჩემპიონის მეტოქე ლოს ანჯელეს ლეიკერსსა და ჰიუსტონ როკეტსს შორის გამარჯვებული იქნება. ამ მომენტისთვის ლეიკერსი სერიაში 3-1 იგებს.

სერიის მე-5 მატჩი შედგა დენვერ ნაგეტსსა და მინესოტა ტიმბერვულვზს შორის და დენვერმა 125-113 იმარჯვა. გამარჯვებული გუნდიდან მორიგი სამმაგი დუბლი შეასრულა ნიკოლა იოკიჩმა - 27 ქულა, 12 მოხსნა და 16 შედეგიანი გადაცემა.

მინესოტადან კი, რომელსაც დონტე დივინჩენცო და ენტონი ედვარდსი გამოაკლდა, საუკეთესო ჯულიუს რენდლი იყო, რომელმაც 27 ქულა და 9 მოხსნა ჩაიწერა აქტივში.

გუნდებს შორის სერიის მე-6 შეხვედრა 1 მაისს გაიმართება.