საქართველოს ჩემპიონატზე ცურვაში დინამო თბილისის სპორტსმენებმა წარმატებით იასპარეზეს, 10 მედალი მოიპოვეს და ორი ეროვნული რეკორდი დაამყარეს.
კლუბმა ტურნირზე ცხრა სპორტსმენით ორ კატეგორიაში მიიღო მონაწილეობა და საერთო ჯამში ხუთი ოქროს, ერთი ვერცხლისა და ოთხი ბრინჯაოს მედალი დაისაკუთრა.
ეროვნული რეკორდები ალექსანდრე ერაძემ და მიხეილ სერედინსკიმ დაამყარეს. ერაძემ 100 მეტრზე ბრასით ცურვაში დისტანცია 1:00.30 წუთში დაფარა, ხოლო სერედინსკიმ 1500 მეტრზე თავისუფალი ყაიდით ცურვაში 15:36.64 წუთი დააფიქსირა.
სერედინსკი რეკორდის დამყარებასთან ერთად აბსოლუტურ კატეგორიაში ტურნირის საუკეთესო მოცურავედაც დასახელდა.
აღსანიშნავია, რომ დინამო თბილისმა საქართველოს ეროვნულ ჩემპიონატზე ცურვაში პირველად იასპარეზა და სადებიუტო გამოსვლა ორი ეროვნული რეკორდითა და ათი მედლით დაასრულა.