ბარსელონა მზად არის მადრიდის ატლეტიკოს წინააღმდეგობის გასატეხად რეალური ნაბიჯი გადადგას და ხულიან ალვარესის სანაცვლოდ 130 მილიონი ევრო შესთავაზოს.
არგენტინელი ფორვარდის საჯარო განცხადებამ, რომ მას მადრიდის დატოვება სურს, კატალონიურ კლუბს ტრანსფერის უნიკალური შანსი მისცა.
საიდუმლო შეხვედრა და ტაქტიკა
SPORT-ის ინფორმაციით, საფუძველი ამ ტრანსფერს ჯერ კიდევ 27 მაისს, ფეხბურთელის აგენტებთან გამართულ ფარულ შეხვედრაზე ჩაეყარა. მას შემდეგ ბარსელონა გააზრებულ დუმილს ინარჩუნებდა.
კატალონიელებს არც მადრიდელების მხრიდან შესაძლო სამართლებრივი დავა აშინებთ არალეგალური მოლაპარაკებების გამო - ამას თანამედროვე ფეხბურთის ჩვეულებრივ თანმდევ პროცესად მიიჩნევენ. წინადადების გაგზავნას ბარსა მუნდიალის დასრულებისთანავე გეგმავს, რათა ფეხბურთელს ნაკრებში კონცენტრაციაში ხელი არ შეუშალოს.
ატლეტიკოს პრინციპული უარი: „არცერთ შემთხვევაში ბარსელონაში“
მიუხედავად ფეხბურთელის სურვილისა, ატლეტიკო პრინციპულ პოზიციაზე დგას, მათთვის ეს „ღირსების საკითხია“ და კონკურენტთან მოლაპარაკებებს გამორიცხავენ:
ჟურნალისტ მანოლო ლამას ცნობით, კლუბის ხელმძღვანელობა იმდენად ჯიუტობს, რომ ურჩევნიათ ალვარესი სკამზე დასვან და საერთოდ არ ათამაშონ, ვიდრე ბარსელონას მიჰყიდონ.
მადრიდელები პრემიერ ლიგის ვარიანტებს განიხილავენ. აქტიურად განიხილება ლონდონის არსენალთან გაცვლის ოპერაცია, სადაც ვიქტორ დიოკერესის ტრანსფერი ფიგურირებს.
