ბარსელონას ფეხბურთელებმა, პედრიმ და ფერან ტორესმა, იუმორისტულ შოუ El Hormiguero-ში სტუმრობისას გუნდში ჰანსი ფლიკის მიერ დამყარებულ დისციპლინაზე ისაუბრეს.
მოთამაშეების თქმით, გერმანელმა სპეციალისტმა შეცვალა მიდგომა და დაგვიანებისთვის ფეხბურთელებს სათადარიგოთა სკამზე აღარ სვამს (როგორც ეს ადრე რაფინიას, მარკუს რაშფორდისა თუ ჟულ კუნდეს შემთხვევაში ხდებოდა). ამის ნაცვლად, ფლიკმა ფულადი სანქციები შემოიღო.
„პუნქტუალურობასთან დაკავშირებით წესები ცოტათი შეიცვალა. თუ აგვიანებ, ჯარიმას იხდი“, — აღნიშნა პედრიმ. ფერან ტორესმა კი დააზუსტა, რომ ჯარიმებმა, შესაძლოა, 40 000 ევროსაც მიაღწიოს.
ფეხბურთელების თქმით, 61 წლის მწვრთნელისთვის დაგვიანებად 3-წამიანი შეფერხებაც კი ითვლება. „ვერც კი წარმომიდგენია, რა ეღირებოდა 20-წუთიანი დაგვიანება“, — ხუმრობით დაამატა ფერანმა.
მიუხედავად მკაცრი გრაფიკისა, მოთამაშეებმა აღნიშნეს, რომ ფლიკი საკმაოდ ლიბერალურია გასახდელში გართობისა თუ Tik-Tok ვიდეოების გადაღების მიმართ და ფეხბურთელებს ამაში ხელს არ უშლის.
