ხორვატიის დედაქალაქ ზაგრებში მიმდინარე ძიუდოს გრან პრიზე საქართველოს დელეგაციას პირველი ოქროს მედლის მოპოვების რეალური შანსი აქვს. 73 კილოგრამ წონით კატეგორიაში მოასპარეზე გიორგი ლოლაძემ ტატამიზე ბრწყინვალედ იასპარეზა და ფინალის საგზური მოიპოვა, რისთვისაც მას ჯამში ხუთი მეტოქის დამარცხება დასჭირდა.
ქართველმა ძიუდოისტმა ტურნირი ლატვიელი ანტონიო დე ანჯელისის იპონით დამარცხებით დაიწყო, რასაც ბრაზილიელი ჯეფერსონ სანტოს ჟუნიორისა და ისრაელის წარმომადგენელ იონათან ელბაზის ერთნაირი შედეგით ჩამოშორება მოჰყვა. მეოთხედფინალურ დაპირისპირებაში ლოლაძემ კანადელ ჯასტინ ლემირს აჯობა და ისიც იპონით დაამარცხა.
ნახევარფინალში გიორგის მეტოქე კოსოვოელი აკილ ჯაკოვა იყო, რომელსაც ქართველმა ასევე სუფთა გამარჯვებით მოუგო და ფინალში გავიდა, სადაც ოქროს მედლისთვის ირლანდიელ ჯოშუა გრინს დაუპირისპირდება. სამწუხაროდ, ამავე წონაში წარუმატებელი აღმოჩნდა გიორგი ტერაშვილის გამოსვლა, რომელიც პირველივე წრეში სლოვაკ ტომაშ ტემრაკუსთან დამარცხდა.
უმედლოდ დაასრულეს ასპარეზობა 81 კგ წონით კატეგორიაში მოჭიდავე ზაურ დვალაშვილმა და გიორგი შერაზადიშვილმაც, ფინალურ ბლოკში გადასვლა ვერცერთმა შეძლო. რაც შეეხება ტურნირის დასკვნით დღეს, 15 ნოემბერს შეჯიბრში საქართველოს ნაკრების კიდევ სამი წევრი ჩაერთვება: ლუკა ჯავახიშვილი (90 კგ), თორნიკე ფოლადიშვილი (100 კგ) და საბა ინანეიშვილი (+100 კგ).
