პრემიერ ლიგის 5 კაპიტანი, რომლებმაც შესაძლოა ზაფხულში კლუბი დატოვონ.
კაპიტნები ნებისმიერი კლუბისთვის უმნიშვნელოვანესი ფიგურები არიან, თუმცა ამ ზაფხულს პრემიერ ლიგის რამდენიმე ვარსკვლავის მომავალი ბუნდოვანია. წარმოგიდგენთ ხუთ ლიდერს, რომელთა წასვლაც რეალურია:
მარტინ ოდეგორი - არსენალი
არსენალს სატრანსფერო ბიუჯეტის შესავსებად ფეხბურთელების გაყიდვა სჭირდება. ნორვეგიელი ნახევარმცველისთვის მიმდინარე სეზონი ტრავმების გამო იმედგაცრუება აღმოჩნდა. მან მხოლოდ 13 მატჩში დაიწყო თამაში ძირითადიდან. ებერეჩი ეზეს მოსვლის შემდეგ, ოდეგორის ადგილი გუნდის საუკეთესო თერთმეტეულში კითხვის ნიშნის ქვეშ დადგა, მისი მდგომარეობით კი ტოპ კლუბები უკვე ინტერესდებიან.
ბერნარდუ სილვა - მანჩესტერ სიტი
მიუხედავად იმისა, რომ პეპ გვარდიოლა სილვას შენარჩუნებისთვის ყოველთვის იბრძოდა, პორტუგალიელის ცხრაწლიანი ეპოქა მანჩესტერ სიტიში შესაძლოა დასრულდეს. მას კონტრაქტი სეზონის ბოლოს ეწურება და 31 წლის მოთამაშის ვარიანტებს შორის იუვენტუსი, ბენფიკა და საუდის არაბეთის კლუბები განიხილება.
ბრუნო ფერნანდეში - მანჩესტერ იუნაიტედი
ფერნანდეში კვლავ ელიტარულ დონეზეა და 14 საგოლე გადაცემით პრემიერ ლიგას ლიდერობს, თუმცა მანჩესტერ იუნაიტედი არჩევანის წინაშე დგას: გაახანგრძლივოს კონტრაქტი თუ გაყიდოს ის. ფეხბურთელს ხელშეკრულების ბოლო 12 თვე ეწყება და 32 წლის ასაკის გათვალისწინებით, კლუბი მისთვის გრძელვადიანი და ძვირადღირებული პირობების შეთავაზებას ერიდება.
კრისტიან რომერო - ტოტენჰემი
არგენტინელი მცველი ტოტენჰემის ხელმძღვანელობას ინვესტიციების ნაკლებობისა და არასაკმარისი სათადარიგო სკამის გამო საჯაროდ აკრიტიკებს. მისი უკმაყოფილება ზაფხულში წასვლაზე მიანიშნებს. თუ სპურსი პრემიერ ლიგიდან გავარდება, რომეროს გაყიდვა გარდაუვალი იქნება.
ჯეროდ ბოუენი - ვესტ ჰემი
ბოუენი გუნდის ერთ-ერთი ყველაზე ძვირადღირებული აქტივია (82 გოლი 269 მატჩში). ვესტ ჰემის მძიმე ფინანსური მდგომარეობა და 104 მილიონიანი ზარალი კლუბს აიძულებს, წამყვანი მოთამაშეები გაყიდოს. მისი წასვლა ნუნუ ესპირიტუ სანტუსთვის უმძიმესი დარტყმა იქნება.
