აქამდე გამართულ მსოფლიოს ყველა საფეხბურთო ჩემპიონატს ჰყავდა დებიუტანტი ეროვნული გუნდები. მონაწილეთა გაზრდილი რაოდენობის მქონე 2026 წლის ჩემპიონატი კი კიდევ უფრო მეტ შანსს აძლევთ იმ ნაკრებებს, რომლებსაც არასოდეს მიუღიათ მონაწილეობა ყველაზე პრესტიჟულ საფეხბურთო ტურნირში.
მოახლოებული სანაკრებო თამაშების წინ კი გთავაზობთ იმ ქვეყნების სიას, რომლებსაც არამხოლოდ თავიანთი საფეხბურთო ისტორიის ახალი ფურცლის დაწერა შეუძლიათ.
უზბეკეთი
უზბეკეთის მუნდიალზე მონაწილეობა უკვე მხოლოდ დროის ამბავია. ეს ქვეყანა ზოგადად სპორტში რომ პროგრესირებს, ამას ბოლო ოლიმპიური თამაშებიც ნათლად მოწმობს. ცნობისთვის, უზბეკები მსოფლიო ჩემპიონატზე ასპარეზობასთან აქამდეც არაერთხელ იყვნენ ახლოს, მაგალითად - 2014 და 2018 წლების ტურნირების შესარჩევ ეტაპებზე, როდესაც სულ მცირედი დააკლდათ წარმატებისთვის. სასიხარულოა ისიც, რომ „თეთრ მგლებს“ ქართული ფესვების მქონე თემურ კაპაძე წვრთნის, რომელიც ახლო წარსულში უზბეკეთის ნაკრების კაპიტანიც იყო.
იორდანია
მოგეხსენებათ, აზიას მუნდიალზე 8 საგზური აქვს, ამიტომაც მეორე აზიური დებიუტანტი დიდი შანსია, იორდანია გახდეს, რომელსაც შესარჩევში გაუმართლა და შედარებით იოლ ჯგუფშია. უზბეკეთის მსგავსად, იორდანიასაც უახლოეს დღეებში შეუძლია ამერიკის კონტინენტზე გასამართი პირველობის საგზური დაჯავშნოს, საამისოდ კი შინ უშუალო კონკურენტის, ერაყის ეროვნული გუნდის დამარცხება სჭირდებათ.
ვენესუელა
ნავთობით მდიდარი ქვეყნის შვილები იმედოვნებენ, რომ ბოლოსდაბოლოს გატეხენ ნავსს და მუნდიალზე იასპარეზებენ. ვენესუელა ხომ CONMEBOL-ის 10 წევრიდან ერთადერთია, რომელსაც არასოდეს უთამაშია უდიდეს საფეხბურთო ფორუმზე.
„ღვინისფერებმა“ ჩემპიონატზე მოსახვედრად ათი ნაკრებიდან სამს მაინც უნდა აჯობონ და სულ მცირე, საკონტინენტათშორისო პლეი-ოფში თამაში დაიბევონ. იმის გათვალისწინებით კი, თუ რა ნაკრებები შეიძლება მოხვდნენ იქ, ვენესუელას ნამდვილად აქვს დიდი შანსი მუნდიალზე გავიდეს.
კაბო-ვერდე
დიდია ალბათობა, რომ აფრიკიდან არაერთი დებიუტანტი ვიხილოთ მსოფლიო პირველობაზე. „შავი კონტინენტისთვის“ დამახასიათებელ არასტაბილურობით გამორჩეულ შესარჩევ ზონას თუ დავხედავთ, ქვეჯგუფებში ისეთი მდგომარეობებია, ამ მომენტისთვის მუნდიალზე მონაწილეობის შანსი სუდანს, ბურკინა-ფასოსა და კომორის კუნძულებსაც კი აქვთ. ჯერ-ჯერობით მაინც რთულია პროგნოზების გაკეთება, თუმცა სავარაუდო დებიუტანტთაგან კაბო-ვერდეს გამოყოფა შეიძლება.
„ლურჯი ზვიგენები“ ამ დროისთვის თავიანთ ჯგუფის ცხრილს უდგანან სათავეში, თუმცა კონკურენტი სახელოვანი კამერუნი ყავთ. აფრიკის ზონაში საკვალიფიკაციო ეტაპი სექტემბერში განახლდება და ოქტომბერში დასრულდება. საინტერესოა შეძლებენ თუ არა კუნძულელები შინ „მოუთვინიერებელი ლომების“ დამარცხებას და მუნდიალზე პირდაპირ მოხვედრას.
გაბონი
აფრიკიდან მსოფლიო ჩემპიონატზე პირველად გასვლის კიდევ ერთი რეალური კანდიდატი დიდიე ოვონოს, დანიელ კუზენის, პიერ-ემერიკ ობამეიანგის, მარიო ლემინასა და დენი ბუანგას სამშობლოა. გაბონელები მინდინარე შესარჩევ ციკლში საკმაოდ კარგად გამოიყურებიან და მხოლოდ 1 ქულით ჩამორჩებიან კოტ დ’ივუარის ნაკრებს, რომელსაც სექტემბერში საკუთარ მოედანზე შეხვდებიან.
აქვე გეტყვით, რომ აფრიკის შესარჩევი ზონიდან მუნდიალზე პირდაპირ გადის 9 ჯგუფის გამარჯვებული გუნდი, ხოლო მეათე ნაკრები საკონტინენტათშორისო პლეი-ოფში ხვდება. თუ გავითვალისწინებთ გაბონის ეროვნული ნაკრების მონაპოვარ ქულებს, ამ ნაკრებს ორივე გზით შეუძლია სანუკვარი მიზნის მიღწევა.
გვატემალა
ნაკლებად სავარაუდოა, მაგრამ შესაძლოა, დებიუტანტი CONCACAF-იდანაც ვიხილოთ. პლანეტის ერთ-ერთი უსუსტესი შესარჩევი ზონიდან რთულია რომელიმე ნაკრების გამორჩევა იმ ქვეყნებიდან, რომლებსაც არასოდეს მიუღიათ მონაწილეობა მუნდიალზე. მოცემული მომენტისთვის, სხვებთან შედარებით, გვატემალის ნაკრებზე შეიძლება მიზერული ფსონის გაკეთება.
ბევრი ასევე აანონსებს კიურასაოს, სურინამის ანდა ნიკარაგუის მუნდიალზე მოხვედრასაც, ასე რომ, საინტერესოა, რა მოხდება ცენტრალური ამერიკა-კარიბის ზღვის აუზის საკვალიფიკაციოში, რომელიც ჯერ კიდევ მეორე ეტაპზეა და მესამე ეტაპზე მონაწილეები ჯერაც გაურკვეველია.
საქართველო
ევროპის ზონიდან კი სავარაუდო დებიუტანტებს შორის უდავოდ ჩვენი ნაკრებია გამოსარჩევი. ყველამ ვიცით, რომ საქართველოს ეროვნული გუნდი ურთულეს ჯგუფში მოხვდა, სადაც თითოეული კალათიდან პრაქტიკულად ყველაზე ძლიერი გუნდები შეხვდა. შემოდგომით გასამართ შესარჩევ მატჩებში „ჯვაროსნებს“ კარგად თამაშთან ერთად იღბალიც უდავოდ დასჭირდებათ. რთულია, მაგრამ შეუძლებელი არაფერია, თუნდაც - პლეი-ოფში მოხვედრა, იქ კი ვინ იცის, ვის რა ელის, ვის გადმოხედავს ფორტუნა...
P.S. დებიუტანტების გარდა, ბოლო სიტყვად კი გეტყვით, რომ ასევე არის შანსები, დიდხნიანი პაუზის შემდეგ მსოფლიო ჩემპიონატს დაუბრუნდნენ ისეთი ნაკრებები, როგორებიც არიან: ერაყი (ითამაშა 1986 წელს), არაბთა გაერთიანებული საამიროები (ითამაშა 1990 წელს), ინდონეზია (ითამაშა 1938 წელს ჰოლანდიის ოსტ-ინდოეთის სახელით), იამაიკა (ითამაშა 1998 წელს), კონგოს დემოკრატიული რესპუბლიკა (ითამაშა 1974 წელს ზაირის სახელით) და ნორვეგია (ბოლოს ითამაშა 1998 წელს).
