ახალი ფალკაო ოლდ ტრაფორდზე

მანჩესტერ იუნაიტედმა, ხანგრძლივი ლოდინის შემდეგ, კოლუმბიელი ნახევარმცველის, კრისტიანო ოროზკოს ტრანსფერი ოფიციალურად გააფორმა.

კლუბმა ფორტალეზასთან შეთანხმებას ჯერ კიდევ 9 თვის წინ მიაღწია, თუმცა ფიფას რეგულაციების გამო, 18 წლის შესრულებამდე ფეხბურთელი ინგლისში ვერ გადადიოდა.

ახალგაზრდა ტალანტი უკვე კერინგტონის ბაზაზეა. კლუბი წყვეტს, ოროზკო აკადემიას შეუერთდება თუ პირდაპირ მაიკლ კერიკის პირველ გუნდთან ერთად დაიწყებს ვარჯიშს.

„ჩემი პლუსი ფიზიკა და ტექნიკაა. უპირველესად ინგლისური უნდა ვისწავლო, რომ გუნდს სწრაფად შევეწყო“, - განაცხადა ახალწვეულმა.

ეს ტრანსფერი Ineos-ის ახალი სტრატეგიის ნაწილია, რომელიც ძვირადღირებული ვარსკვლავების ნაცვლად, ტალანტების ადრეულ ეტაპზე შეძენას ითვალისწინებს. ოროზკო იუნაიტედის ისტორიაში მხოლოდ მეორე კოლუმბიელია რადამელ ფალკაოს შემდეგ.