კატარის დედაქალაქ დოჰაში გამართულ UFC-ის ღონისძიებაზე ალექსანდრე თოფურია მექსიკელ სანტიაგო ლუნასთან მსაჯთა გაყოფილი გადაწყვეტილებით დამარცხდა.
როგორც ელ კონკისტადორის წინა ორ ბრძოლაში, გამარჯვებულის ვინაობა ამჯერადაც არბიტრებმა გაარკვიეს (ერთმა ხმა თოფურიას მისცა, ორმა კი ლუნას).
თუმცა, მარცხს შესაძლოა ობიექტური მიზეზი ჰქონდეს. შერეული ორთაბრძოლების გვერდი MMAProsPick ავრცელებს ინფორმაციას, რომ ალექსანდრემ პირველსავე რაუნდში ტრავმა მიიღო, რამაც მას სრული ძალებით ბრძოლის საშუალება არ მისცა.
„თოფურიამ პირველ რაუნდში მხარი დაიზიანა და მას შემდეგ მარცხენა ხელი ლუნასთვის აღარ დაურტყამს. გარდა ამისა, თოფურიამ ტრავმის გამო ვერც ჭიდაობა შეძლო“, - წერს პორტალი.
გამოცემის თანახმად, სანამ ბრიუს ბაფერი გამარჯვებულს გამოაცხადებდა, ალექსანდრემ თავის კუთხეში მყოფ ილია თოფურიასა და გურამ ქუთათელაძეს ქართულად უთხრა, რომ პირველ რაუნდში მარცხენა ხელი დაიზიანა. აღსანიშნავია, რომ ტრავმის შესახებ ინფორმაცია ოფიციალურად ჯერ არც თავად მებრძოლს და არც მისი გუნდის წევრებს დაუდასტურებიათ.