ლივერპულმა გუნდის მეკარე, ალისონ ბეკერი, ხელშეუხებელ ფეხბურთელად გამოაცხადა, მიუხედავად იმისა, რომ კლუბში მთავარი მწვრთნელის, არნე სლოტის გათავისუფლების შემდეგ დიდი გაურკვევლობაა.
ბრაზილიელი კარის დარაჯის შეძენით ტურინის იუვენტუსი სერიოზულად არის დაინტერესებული, თუმცა მერსისაიდელებს თავისი პირველი ნომრის გაშვება აზრადაც არ მოსდით.
გავლენიანი სატრანსფერო ექსპერტის, ფაბრიციო რომანოს ინფორმაციით, სამწვრთნელო შტაბში მომხდარი ცვლილებების მიუხედავად, ლივერპულის მენეჯმენტის პოზიცია ურყევია. იტალიური მედია წერდა, რომ იუვენტუსმა 33 წლის მეკარეს გრძელვადიანი კონტრაქტი შესთავაზა და მაისში პირადი პირობებიც შეათანხმა, თუმცა ინგლისურმა კლუბმა ტრანსფერს მწვანე შუქი არ აუნთო. ენფილდის ხელმძღვანელობამ ალისონს ხელშეკრულება 2027 წლის ივნისამდე ჯერ კიდევ მიმდინარე წლის დასაწყისში გაუხანგრძლივა.
პრემიერლიგის გასულ სეზონში ბრაზილიელმა 26 მატჩი ჩაატარა და 8 შეხვედრაში კარი მშრალად შეინახა. კლუბში მისი სტაბილურობა ახლა განსაკუთრებით მნიშვნელოვანია, რადგან არნე სლოტი დაკავებული თანამდებობიდან შაბათს, გუნდის მეხუთე ადგილზე გასვლისა და ჩემპიონთა ლიგის საგზურის დაკარგვის გამო გაათავისუფლეს.
ამჟამად ალისონი სრულად ბრაზილიის ნაკრებზეა კონცენტრირებული და ჩრდილოეთ ამერიკაში დაგეგმილი მსოფლიო ჩემპიონატისთვის ემზადება. ლივერპული კი პარალელურად ახალი მთავარი მწვრთნელის ძებნას იწყებს.
