ალონსო: "მსაჯებზე ლაპარაკი არ მინდა, მაგრამ ჰაუსენი ყვითელს იმსახურებდა და არა წითელს"

ჩაბი ალონსომ რეალის სოსიედადთან მოპოვებული გამარჯვება შეაფასა.

მადრიდულმა გუნდმა გასვლაზე 2:1 მოიგო, მიუხედავად იმისა, რომ დინ ჰაუსენის გაძევების შემდეგ, 32-ე წუთიდან 10 კაცით თამაშობდა.

- იმსახურებდა თუ არა ჰაუსენი წითელ ბარათს?

ჩემი აზრით, სუფთა ყვითელი იყო. მილიტაოც ახლოს იყო და ოიარსაბალიც ბურთს ვერ აკონტროლებდა. გამეორება ვნახე და აზრი არ შემიცვლია. მსაჯს ვკითხე, მან თავისი პოზიცია დამისაბუთა, თუმცა ვერ დამარწმუნა. ამით მოვრჩები.

ამან თამაშის მიმდინარეობა შეცვალა, თითქმის 60 წუთი 10 კაცით ვითამაშეთ. ჩვენი მომენტები გვქონდა და მეორე გოლიც გავიტანეთ. ანოეტაზე გამარჯვება ყოველთვის ძალიან რთულია, დღეს კი კიდევ უფრო რთული იყო.

- მონაცემები არ იტყუება - VAR-ი თამაშში გაცილებით იშვიათად ერთვება...

როცა აშკარა შეცდომას აქვს ადგილი, ვიდეორეფერის ჩართვა მომწონს; როცა არა, მესმის, რომ ამის გაკეთება საჭირო არ არის. არ მინდა მსაჯებზე ლაპარაკი.

- კი მაგრამ, ამას შეიძლებოდა მატჩის ბედი შეეცვალა...

ამან თავისი დიდი წვლილი შეიტანა. გოლის გატანაზე ფიქრი შეგვეძლო, მაგრამ მეორე ტაიმში უფრო ფრთხილად მოგვიწია თამაში. პენალტი აშკარა იყო. 10 კაცითაც უნდა შეგეძლოს თამაში. 

- როგორ არის ჰაუსენი? ეს მისი მეორე გაძევებაა რეალში... რაიმე რჩევა ხო არ გაქვთ მისთვის, როგორ არ იყოს ასეთი იმპულსური?

გამარჯვების შემდეგ მან შვება იგრძნო. აშკარაა, რომ გაბრაზებული იყო, მაგრამ მოგებამ გაახარა. ამის თავიდან არიდება მარტივად შეიძლებოდა: კარი ძალიან შორს იყო და ოიარსაბალი ბურთსაც ვერ აკონტროლებდა. ცხადია, დინს უკეთ შეეძლო მოქმედება.