ალონსოს ჯაკა ჩელსიში სურს

Sky Sport-ის ექსკლუზიური ინფორმაციით, გრანიტ ჯაკამ ჩელსისთან სიტყვიერ შეთანხმებას უკვე მიაღწია.

ამ ტრანსფერის მთავარი ინიციატორი ჩელსის ახალი მთავარი მწვრთნელი, ჩაბი ალონსოა, რომელსაც ჯაკასთან მუშაობის ძალიან წარმატებული გამოცდილება აქვს ბაიერ ლევერკუზენში. სწორედ მათი ერთობლივი ძალისხმევით შეძლო გერმანულმა კლუბმა 2024 წელს ბუნდესლიგისა და გერმანიის თასის მოგება, ანუ დუბლის შესრულება.

ჯაკა ამჟამად სანდერლენდის ღირსებას იცავს, სადაც გასულ ზაფხულს გადავიდა და მალევე გუნდის კაპიტანიც გახდა. კლუბმა მისი ლიდერობით შესანიშნავი სეზონი ჩაატარა. 36 ჩატარებული მატჩით ჯაკამ უდიდესი წვლილი შეიტანა გუნდის წარმატებაში, რაც საბოლოოდ პრემიერ ლიგის ახალწვეული კლუბისთვის ევროპა ლიგის საგზურის მოპოვებით დაგვირგვინდა.

მიუხედავად იმისა, რომ ფეხბურთელს სანდერლენდთან კონტრაქტი 2028 წლამდე აკავშირებს, ალონსოს სურვილი ამ ტრანსფერის ალბათობას მაღალს ხდის.

კლუბებს შორის კომუნიკაცია უკვე დაწყებულია და ორივე მხარე დეტალების დაზუსტებას ცდილობს. ეს ტრანსფერი განიხილება როგორც ჩელსის ახალი პროექტის მნიშვნელოვანი ნაწილი, სადაც ალონსო გამოცდილი და ტაქტიკურად მოაზროვნე ფეხბურთელების გარშემო აშენებს გუნდს, რისთვისაც ჯაკას ფიგურა იდეალურად მიიჩნევა.