კიმი ანტონელიმ ბელგიის გრან პრიზე დრამატულ ბრძოლაში მოიგო და გამარჯვების გზას დაუბრუნდა.
მერსედესის იტალიელმა პილოტმა ფინიშზე მხოლოდ მცირედი უპირატესობით აჯობა ფერარის შარლ ლეკლერს, ხოლო მაქს ვერსტაპენი სეზონის მე-3 პოდიუმს დასჯერდა და მე-3 ადგილი დაიკავა.
სტარტზე ვერსტაპენმა შესანიშნავად იასპარეზა და ეუ-რუჟის მონაკვეთში ანტონელის გადაუსწრო, თუმცა ლიდერობა დიდხანს ვერ შეინარჩუნა და მალევე კვლავ დათმო პირველი პოზიცია.
სანამ ანტონელი ლიდერობას ინარჩუნებდა, მის თანაგუნდელ ჯორჯ რასელს რბოლა ნაადრევად დაუსრულდა.
ის ორივე ფერარის უკან აღმოჩნდა, შემდეგ კი ლუის ჰამილტონთან შეხების შედეგად დატრიალდა, ხრეშში გადავარდა და რბოლას გამოეთიშა, რაც ჩემპიონატის ტიტულისთვის ბრძოლაზეც მნიშვნელოვან გავლენას მოახდენს.
ანტონელიმ უსაფრთხოების მანქანის შემდეგაც გაუძლო ზეწოლას და ლეკლერის გვიან შეტევასაც წარმატებით უპასუხა. მან ფინიშის ხაზი 1.9 წამით ადრე გადაკვეთა და 2026 წლის სეზონში მე-6 გამარჯვება მოიპოვა, პირველი კი მონაკოს გრან-პრის შემდეგ.
ლეკლერმა ზედიზედ მეორე გამარჯვება ვერ მოიპოვა, თუმცა დამაჯერებლად შეინარჩუნა მეორე ადგილი ვერსტაპენის წინ.
მე-4-ზე გავიდა ფერარის მეორე პილოტი ლუის ჰამილტონი, რომელსაც რასელთან ინციდენტისთვის ხუთწამიანი ჯარიმა დაეკისრა. გარდა ამისა, რბოლის შემდეგ მას პიტ-სტოპიდან არაუსაფრთხო გამოშვების გამო დამატებითაც გამოიძიებენ. მე-5 ადგილი მაკლარენის ოსკარ პიასტრიმ დაიკავა.
პირველ ხუთეულს მოჰყვნენ ისაკ ჰაჯარი, რომელმაც სტარტი ბოლო პოზიციიდან აიღო და შთამბეჭდავი გარღვევით მე-6 ადგილი მოიპოვა, ლანდო ნორისი, რომელმაც მე-13 ადგილიდან მე-7-მდე წინ წაიწია, აუდის წარმომადგენელი გაბრიელ ბორტოლეტო მე-8-ზე, ხოლო არვიდ ლინდბლადი და ფრანკო კოლაპინტო საუკეთესო ათეულს ასრულებდნენ.
ბელგიის გრან პრის შემდეგ მრბოლელთა საჩემპიონო დავაში ასეთი სიტუაციაა:
1. ანტონელი - 204 ქულა
2. ჰამილტონი - 159 ქულა
3. რასელი - 154 ქულა
4. ლეკლერი - 126 ქულა
5. ნორისი - 103 ქულა
6. პიასტრი - 92 ქულა
7. ვერსტაპენი - 91 ქულა
8. ჰაჯარი - 60 ქულა
9. გასლი - 42 ქულა
10. ლოუსონი - 39 ქულა
