ანტუანის ბოლო ცეკვა — ატლეტიკომ გრიზმანის წასვლა დაადასტურა

მადრიდის ატლეტიკომ ოფიციალურად გამოაცხადა, რომ ანტუან გრიზმანი სეზონის დასრულების შემდეგ კლუბს დატოვებს.

35 წლის ფრანგი თავდამსხმელი ზაფხულში ამერიკულ ორლანდო სიტის შეუერთდება. კლუბის ნებართვით, გრიზმანი აშშ-ში კონტრაქტის გასაფორმებლად უკვე გაემგზავრა.

მანამდე გავრცელებული ინფორმაციით, ფეხბურთელმა ორლანდოსთან ორწლიანი ხელშეკრულება შეათანხმა, რომლის მიხედვითაც მისი წლიური ხელფასი 10 მილიონი ევრო იქნება.

ანტუან გრიზმანი ატლეტიკოში 2014 წელს გადავიდა (2019-2022 წლებში ბარსელონაში გამოდიოდა). ის მადრიდული კლუბის ისტორიაში საუკეთესო ბომბარდირია 211 გოლით და რეკორდსმენია ჩატარებული მატჩების რაოდენობით (488).

ატლეტიკოს შემადგენლობაში მან ესპანეთის სუპერთასი, ევროპა ლიგა და ევროპის სუპერთასი მოიგო.