ესპანური ფეხბურთის ლეგენდამ, სერხიო რამოსმა, პრესკონფერენციაზე მწვავედ უპასუხა ბრალდებებს და საკუთარი ბიზნეს-რეპუტაცია დაიცვა მას შემდეგ, რაც სევილიას ყიდვის მიზნით მის მიერ შექმნილი კონსორციუმის 444-მილიონიანი გარიგება ბოლო მომენტში ჩაიშალა.
40 წლის ყოფილმა მცველმა კატეგორიულად უარყო თაღლითობისა და მოტყუების მცდელობა, რაც მას ფინანსური წინადადების ბოლო მომენტში შეცვლის გამო წაუყენეს.
The Athletic-ის ინფორმაციით, რამოსისა და მექსიკელი ინვესტორების ჯგუფს ანდალუსიური კლუბის აქციების 85%-ის ყიდვა სურდა. მოლაპარაკებები მას შემდეგ შეწყდა, რაც ინვესტორებმა ბოლო შეხვედრაზე პირობები შეცვალეს, კლუბის ამჟამინდელმა აქციონერებმა კი ახალი სტრუქტურა არათანმიმდევრულად მიიჩნიეს და 31 მაისის ექსკლუზიური ვადის ამოწურვამდე პროცესი გაყინეს.
რამოსმა პრესასთან დეტალურად განმარტა, თუ რატომ შეიცვალა წინადადება და აღნიშნა, რომ ყველაფერი ლა ლიგის ფინანსური წესების დაცვით გააკეთეს:
მინდა მკაფიოდ ვთქვა: ჩვენ აქ არავის მოსატყუებლად ან დასაყაჩაღებლად არ მოვსულვართ! რეალობას ამახინჯებენ. ფული მთლიანად Banco Santander-იდან და კიდევ ერთი საერთაშორისო ბანკიდან იყო გარანტირებული. თავიდან თითო აქციაში 3175 ევროს ვიხდიდით, თუმცა წინადადება იმიტომ შევცვალეთ, რომ კლუბის გადასარჩენად კაპიტალის 80 მილიონით გაზრდა საკმარისი არ აღმოჩნდა - ლა ლიგის გაიდლაინებით 120 მილიონია საჭირო.
ერთადერთი განსხვავება ის იყო, რომ აქციების საფასურის გადახდა ორ ნაწილად დავყავით. ოთხშაბათის შემდეგ პასუხი არ მიგვიღია. პირველად ვზივარ აქ როგორც ბიზნესმენი და არა ფეხბურთელი. მე მათ კვლავ ვუსმენ, რადგან დრო იწურება - კაპიტალის გაზრდა 30 ივნისამდე უნდა დასრულდეს, თორემ სევილიას ფინანსური მდგომარეობა კატასტროფულია
მიუხედავად აქციონერების მხრიდან წამოსული კრიტიკისა, მექსიკურ-ესპანური კონსორციუმი იმედს არ კარგავს, რომ გარიგება მაინც შედგება და სევილია ფინანსურ ფეირ-პლეისთან დაკავშირებულ კრიზისს თავს დააღწევს. თავად სერხიო რამოსი, მექსიკური მონტერეიდან წამოსვლის შემდეგ, ამჟამად თავისუფალი აგენტია და პარალელურად საკუთარ მომავალსაც წყვეტს.
