მადრიდის რეალის ნახევარმცველმა ორელიენ ჩუამენიმ ფედერიკო ვალვერდესთან მომხდარი ინციდენტის შესახებ მედიაში გავრცელებული ხმები უარყო.
ფრანგმა განაცხადა, რომ სიტუაცია გააზვიადეს. ჩუამენიმ ხაზგასმით აღნიშნა, რომ თავის თანაგუნდელისთვის ხელი არასდროს დაურტყამს.
ეს კომენტარი მოჰყვა მიმდინარე თვის დასაწყისში გავრცელებულ ინფორმაციას, რომლის მიხედვითაც, მადრიდის რეალის სავარჯიშო ბაზაზე ფეხბურთელებს შორის ფიზიკური დაპირისპირება მოხდა. მედია წერდა, რომ ჩუამენიმ ვალვერდეს დაარტყა, რის შემდეგაც ურუგვაელმა დაცემისას თავი დააზიანა, საავადმყოფოში გადაიყვანეს და ორი კვირით ჩამოაშორეს მოედანს.
კვირას მედიასთან საუბრისას ჩუამენიმ განმარტა, რომ მათ შორის გარკვეული უთანხმოება მართლაც მოხდა, თუმცა პრესამ ყველაფერი გააზვიადა. მისი თქმით, გავრცელებული ინფორმაცია ჩხუბისა და დარტყმების შესახებ სრული სისულელეა. ფეხბურთელმა დაამატა, რომ მას და ვალვერდეს საერთო მიზანი აქვთ - მადრიდის რეალისთვის ტიტულების მოგება და რომ მათ შორის არანაირი პრობლემა არ არსებობს.
