რეალ მადრიდის მთავარმა მწვრთნელმა, ალვარო არბელოამ განაცხადა, რომ ის ესპანეთს რასისტულ ქვეყნად არ მიიჩნევს.
ეს კომენტარი მიმდინარე კვირაში ესპანეთისა და ეგვიპტის ამხანაგურ მატჩზე გაჟღერებულ ისლამოფობიურ შეძახილებს მოჰყვა. RCDE სტადიონზე გულშემატკივართა ჯგუფის სკანდირება, „ვინც არ ხტება, მუსლიმია“, ესპანური მედიის მთავარ თემად იქცა, ფაქტს კი კატალონიის პოლიცია იძიებს.
ესპანელი ფანების შეურაცხმყოფელი სიმღერა და ლამინ იამალის პროტესტი
ინციდენტი, რომელმაც ლამინ იამალი დათრგუნა
ამ შემთხვევამ დაჩრდილა ესპანეთის ნაკრების ბოლო საშინაო მატჩი მსოფლიო ჩემპიონატის წინ. ლამინ იამალმა მოედანი მარტომ დატოვა, მაშინ როცა მისი თანაგუნდელები გულშემატკივრების წინაშე საპატიო წრეს არტყამდნენ. მომდევნო დღეს ფეხბურთელმა განცხადება გაავრცელა, სადაც აღნიშნა, რომ მსგავსი შეძახილები „აუტანელი“ და „რასისტულია“.
ლამინ იამალი ესპანელ ფანებს დაუპირისპირდა
რეალ მადრიდის თავკაცს ამ ინციდენტზე აზრი პრესკონფერენციაზე ჰკითხეს. მიუხედავად იმისა, რომ მანამდე არბელოა უეფასგან ბენფიკას მოთამაშის, ჯანლუკა პრესტიანის მკაცრ დასჯას ითხოვდა (ვინისიუს ჟუნიორის მიმართ რასისტული შეურაცხყოფის გამო), ესპანეთში არსებულ ვითარებას ის უფრო რბილად აფასებს.
მჯერა, რომ ესპანეთი რასისტული ქვეყანა არ არის. ასე რომ იყოს, პრობლემები ყოველ უქმეებზე გვექნებოდა. გარკვეული ქცევები უნდა აღმოვფხვრათ, თუმცა მე კვლავაც დავიცავ ჩემს პოზიციას: ესპანეთი დიდი და ტოლერანტული ქვეყანაა. განზოგადება არ შეიძლება, მაგრამ ბრძოლა ასეთი გამოხტომების წინააღმდეგ იგივე ძალით უნდა გავაგრძელოთ.
მსოფლიო ჩემპიონატის ფინალი საფრთხეშია?
ფრაზა „ესპანეთი რასისტული ქვეყანა არ არის“ ხშირად ისმის ლა ლიგაში მომხდარი ინციდენტების საპასუხოდ, თუმცა ამჯერად მედია პრობლემის მასშტაბებზე უფრო აქტიურად საუბრობს. საკუთარი ნაკრების ფეხბურთელის შეურაცხყოფამ საშინაო კედლებში სიტუაცია კიდევ უფრო დაამძიმა.
არსებობს საფრთხე, რომ ფიფამ ზედიზედ მომხდარი რასისტული ფაქტების გამო, 2030 წლის მსოფლიო ჩემპიონატის ფინალის მასპინძლობის უფლება მაროკოს გადასცეს. ესპანეთი თავის სამხრეთელ მეზობელს სწორედ ამ პრესტიჟული მატჩის მისაღებად ებრძვის.
