ბარსელონას ნახევარმცველი ფერმინ ლოპესი პრემიერ ლიგის წამყვანი კლუბების ინტერესის სფეროში მოექცა.
Diario Sport-ის ინფორმაციით, კატალონიურმა კლუბმა 23 წლის ფეხბურთელის სანაცვლოდ უკვე მიიღო 100 მილიონი ევროს ღირებულების შეთავაზებები, თუმცა უცნობია, რამდენმა გუნდმა გამოთქვა მზადყოფნა ამ თანხის გადასახდელად.
ფერმინის შეძენით ყველაზე მეტად ჩელსი და მანჩესტერ იუნაიტედი ინტერესდებიან. გარდა ამისა, ტრანსფერის განხორციელება კიდევ ორ წამყვან ინგლისურ კლუბს სურს, რომელთა ვინაობაც ჯერჯერობით არ სახელდება.
გასულ ზაფხულს ჩელსიმ ესპანელი ნახევარმცველის სანაცვლოდ 70 მილიონი ევრო შესთავაზა ბარსელონას, თუმცა კატალონიელებმა ეს თანხა არასაკმარისად მიიჩნიეს და შეთავაზებას არც კი უპასუხეს.
თავად ფერმინ ლოპესი კლუბის დატოვებას არ აპირებს. ფეხბურთელს კარიერის ბარსელონაში გაგრძელება სურს და სხვა გუნდების წინადადებებს არ განიხილავს.
ნახევარმცველის პროგრესის გათვალისწინებით, ბარსელონას ხელმძღვანელობა მისი კონტრაქტის პირობების გაუმჯობესებას გეგმავს. კლუბში მიიჩნევენ, რომ მოქმედი ხელშეკრულება ფეხბურთელის ამჟამინდელ დონეს აღარ შეესაბამება.
ფერმინმა კონტრაქტი 2026 წლის იანვარში გააფორმა და ის 2031 წლის ზაფხულამდე მოქმედებს. ხელშეკრულებაში გამოსასყიდ თანხად 500 მილიონი ევროა მითითებული.
