ბარსელონას მთავარი მწვრთნელი, ჰანსი ფლიკი, ჩემპიონთა ლიგაში პარი სენ-ჟერმენთან რთული დაპირისპირების წინ ტაქტიკური თავსატეხის წინაშეა.
კატალონიელთა დაცვის ხაზი ისედაც შესუსტებულია, გუნდს ერიკ გარსია, ჟიულ კუნდე და ანდრეას კრისტენსენი ვერ ეხმარებიან, ახლა კი მათ რიგებს შესაძლოა ჟერარ მარტინიც შეუერთდეს.
ესპანური მედიის ინფორმაციით, რეალ ბეტისთან მატჩის მიწურულს მიღებული ძლიერი დარტყმის შემდეგ, მარტინს კოჭის არეში შეშუპება აღენიშნება. მართალია, სამედიცინო შემოწმებამ სერიოზული სტრუქტურული დაზიანება გამორიცხა, თუმცა მისი მოედანზე გასვლის საკითხი ბოლო წუთამდე ღიად დარჩება.
ამ დანაკლისების ფონზე, პირველ გუნდში მხოლოდ 5 ნომინალური მცველია, რის გამოც ფლიკმა ბარსელონა ატლეტიკის ახალგაზრდა უკანახაზელს, ალექს კამპოსს უხმო. ახლა სამედიცინო შტაბმა, მწვრთნელებმა და თავად ფეხბურთელმა უნდა შეაფასონ ყველა რისკი. ვინაიდან კუნდეს თამაში მომდევნო კვირას დაგეგმილ ელ კლასიკოშიც საეჭვოა, ბარსელონას მცველების გაფრთხილება ძალიან სჭირდება. თანაც, ჩემპიონთა ლიგის ამ ადრეულ ეტაპზე სატურნირო მდგომარეობა ზედმეტი რისკის გარეშე მოქმედების საშუალებას იძლევა.
ჟერარ მარტინი საოცარი ფიზიკური გამძლეობით გამოირჩევა და კლუბში გატარებული ოთხი სეზონის განმავლობაში კუნთისა თუ სახსრის პრობლემა არასდროს ჰქონია. მისი სწრაფი პროგრესი და დისციპლინა კი ნათლად ხსნის, თუ რატომ ენდობა მას ჰანსი ფლიკი ასე ძალიან.
