ბოლო გაფრთხილება - აბრამოვიჩს ჩელსის გაყიდვისას დადებული პირობა შეახსენეს

დიდი ბრიტანეთის მთავრობამ რომან აბრამოვიჩს „საბოლოო შანსი“ მისცა, შეასრულოს ჩელსის გაყიდვიდან მიღებული 2.5 მილიარდი ფუნტის გადარიცხვა, რომელიც სამ წელზე მეტია გაყინულია.

კანცლერმა რეიჩელ რივზმა დღეს გასცა ლიცენზია, რომელიც თანხების გადარიცხვას შესაძლებელს ხდის ახალი ფონდისთვის, რომლის მიზანიც უკრაინაში ჰუმანიტარული დახმარების გაწევაა.

კირ სტარმერმა აბრამოვიჩს მოუწოდა, დაადასტუროს თანხების გადარიცხვა, წინააღმდეგ შემთხვევაში მას სასამართლო დავა ელოდება, რაც დიდი ბრიტანეთის მთავრობას საბოლოოდ მისცემს საშუალებას, თანხები გაათავისუფლოს.

სტარმერმა პარლამენტარებს განუცხადა:

„ჩემი გზავნილი აბრამოვიჩისთვის ასეთია: დრო იწურება. პატივი ეცი იმ ვალდებულებას, რომელიც აიღე და ახლავე გადაიხადე. თუ ამას არ გააკეთებ, მზად ვართ სასამართლოს მივმართოთ, რათა თითოეულმა პენიმ მიაღწიოს იმ ადამიანებამდე, რომელთა სიცოცხლე პუტინის უკანონო ომმა დაანგრია.“

აბრამოვიჩმა 2022 წელს დადო პირობა, რომ კლუბის გაყიდვიდან მიღებული შემოსავლები რუსეთის მიერ უკრაინაში შეჭრის მსხვერპლთა მხარდაჭერას მოხმარდებოდა.