ბრაზილიაში ნორისმა მოიგო - მერამდენე ჩემპიონობა მოიპოვა მერსედესმა?

ლანდო ნორისმა სან პაულოს წვიმიან და დრამატულ გრან პრიზე მაქს ვერსტაპენს აჯობა და გამარჯვება მოიპოვა, ხოლო მერსედესმა 2026 წლის ფორმულა 1-ის კონსტრუქტორთა ჩემპიონატი მოიგო.

ჟოზე კარლოს პასეს სახელობის ავტოდრომზე გამართულ 71-წრიან რბოლაში ნორისმა სეზონში მე-3 გამარჯვება მოიპოვა.

რბოლა სველ ტრასაზე დაიწყო, თუმცა მოგვიანებით ტრასა გაშრა. ამის მიუხედავად, ფინალურ ეტაპზე პილოტებს კვლავ წვიმაში მოუწიათ ასპარეზობა.

მაკლარენის მრბოლელმა, რომელმაც სტარტი პოულ პოზიციიდან აიღო, საბოლოოდ გამარჯვება 14.6-წამიანი უპირატესობით მოიპოვა.

მაქს ვერსტაპენმა, რომელმაც რბოლა 21-ე პოზიციიდან დაიწყო, შთამბეჭდავი წინსვლა აჩვენა და მე-2 ადგილზე გავიდა. რედ ბულისთვის წარმატებული აღმოჩნდა ისაკ ჰაჯარის გამოსვლაც, რომელმაც მე-3 ადგილი დაიკავა და გუნდს ორმაგი პოდიუმი მოუტანა.

ჯორჯ რასელმა და კიმი ანტონელიმ შესაბამისად მე-4 და მე-5 ადგილები დაიკავეს. აღსანიშნავია, რომ ანტონელი, რომელიც რბოლის საწყის ეტაპზე ლიდერობდა, 2-ჯერ დატრიალდა, მათ შორის ერთხელ სტარტამდეც.

მიუხედავად ამისა, მიღებული შედეგი მერსედესისთვის საკმარისი აღმოჩნდა, რათა კონსტრუქტორთა ჩემპიონატის გამარჯვებული გამხდარიყო.

მაკლარენის პილოტმა ოსკარ პიასტრიმ მე-6 ადგილი დაიკავა, ხოლო მე-7 პოზიციაზე ფერარის მრბოლელი შარლ ლეკლერი გავიდა.

მონეგასკმა ბოლოსწინა წრეზე ლიამ ლოუსონს გადაასწრო. რეისინგ ბულსის პილოტი რბოლის საწყის წრეებზე მე-2 პოზიციაზეც იმყოფებოდა.

ლუის ჰამილტონმა ფორმულა 1-ში კარიერის მე-400 რბოლა მე-9 ადგილზე დაასრულა. ფერარის ბრიტანელმა მრბოლელმა სტარტი მე-20 პოზიციიდან აიღო და რბოლის მიმდინარეობისას დატრიალების მიუხედავად, ქულების მოპოვება შეძლო.

საუკეთესო ათეული აუდის პილოტმა ნიკო ჰიულკენბერგმა დაასრულა.

გერმანულმა გუნდმა ისტორიაში მეცხრედ მოიპოვა კონსტრუქტორთა მსოფლიო ჩემპიონის ტიტული. მერსედესისთვის ეს პირველი ჩემპიონობაა 2021 წლის შემდეგ.