ისტორიასთან ერთ ნაბიჯში - ანტონელი ჩემპიონობას უახლოვდება

კიმი ანტონელიმ ამერიკის შეერთებული შტატების გრან პრიზე სიმშვიდე შეინარჩუნა, გამარჯვება მოიპოვა და ფორმულა 1-ის მსოფლიო ჩემპიონობისკენ კიდევ ერთი მნიშვნელოვანი ნაბიჯი გადადგა.

სტრატეგიულ ბრძოლაში ახალგაზრდა იტალიელმა შარლ ლეკლერსა და მაქს ვერსტაპენს აჯობა.

ანტონელის შესანიშნავმა პირველმა წრემ და ვერსტაპენის წარუმატებელმა სტარტმა იტალიელს საშუალება მისცა, რბოლის დასაწყისშივე დაწინაურებულიყო.

მან ლიდერობა ბოლომდე შეინარჩუნა და მხოლოდ ერთი პიტ-სტოპის გამოყენებით სეზონში მე-9 გრან პრი მოიგო.

მაშინ, როდესაც მისმა ბევრმა კონკურენტმა პიტ-სტოპზე 2-ჯერ შეიარა, ანტონელიმ საშუალო სიმყარის საბურავებით შთამბეჭდავი მონაკვეთი გაიარა, შემდეგ კი ჰარდ-საბურავები ფინიშამდე ეფექტურად გამოიყენა.

საბოლოოდ, მან უახლოეს მდევარს 13.078 წამით აჯობა, მიუხედავად იმისა, რომ ბოლო წრის წინ ვირტუალური უსაფრთხოების მანქანის რეჟიმმა პილოტებს შორის სხვაობა შეამცირა.

მის უკან, რბოლის მიწურულს განხორციელებული წარმატებული მანევრის წყალობით, შარლ ლეკლერი მე-2 ადგილზე გადავიდა და ზედიზედ მე-2 გრან პრიზე მე-2 პოზიცია დაიკავა.

მაქს ვერსტაპენმა კი, მიუხედავად რედ ბულის ბოლიდთან დაკავშირებული რამდენიმე პრობლემისა, მე-3 ადგილი შეინარჩუნა და პოდიუმზე ავიდა.

ლუის ჰამილტონმა მე-4 ადგილი დაიკავა და ფერარის დამატებითი ქულები მოუტანა. ლანდო ნორისმა გაცვეთილი საბურავების გამო პოდიუმზე ასვლის შანსი დაკარგა და საბოლოოდ მე-5 პოზიციაზე გავიდა.

მათ უკან რედ ბულის პილოტი ისაკ ჰაჯარი და მაკლარენის მეორე მრბოლელი ოსკარ პიასტრი განლაგდნენ.

თუ მომდევნო ეტაპზე, მეხიკოში, ანტონელი თავის თანაგუნდელთან 23 ქულაზე მეტს, ხოლო ლუის ჰამილტონთან 24 ქულაზე მეტს არ დაკარგავს, იტალიელი ფორმულა 1-ის ისტორიაში ყველაზე ახალგაზრდა მსოფლიო ჩემპიონი გახდება.