აფრიკის ფეხბურთის კონფედერაციის (CAF) აღმასრულებელმა კომიტეტმა ერთხმად მიიღო გადაწყვეტილება, რომ აფრიკის ერთა თასი (AFCON) კვლავ 2 წელიწადში ერთხელ გაიმართება.
CAF-ის პრეზიდენტმა, დოქტორმა პატრის მოტსეპემ, 2026 წლის 7-9 ოქტომბერს კაბო-ვერდეში გამართულ CAF-ის სტრატეგიულ კონფერენციაზე განაცხადა, რომ აღმასრულებელი კომიტეტი გადახედავდა და ხელახლა შეაფასებდა გასულ წელს მიღებულ გადაწყვეტილებას, რომლის მიხედვითაც აფრიკის ერთა თასი 4 წელიწადში ერთხელ უნდა ჩატარებულიყო.
გადაწყვეტილების გადახედვის აუცილებლობა რამდენიმე ფაქტორმა განაპირობა. მათ შორის მთავარი იყო იმის გაცნობიერება, რომ ახალი პანაფრიკული ტურნირის, აფრიკის ერთა ლიგის შექმნას, რომელსაც არსებული აფრიკის ერთა თასი უნდა ჩაენაცვლებინა და 2 წელიწადში ერთხელ გამართულიყო, რამდენიმე წელი დასჭირდებოდა.
ამასთან, ახალ ტურნირს მნიშვნელოვანი ფინანსური რესურსების გამომუშავებამდე დიდი დრო დასჭირდებოდა, რაც აუცილებელია CAF-ის ტურნირებისა და ზოგადად აფრიკული ფეხბურთის გლობალურ დონეზე კონკურენტუნარიანობისა და ფინანსური დამოუკიდებლობის უზრუნველსაყოფად.
აფრიკის ერთა თასის მომდევნო გათამაშება 2027 წელს კენიაში, ტანზანიასა და უგანდაში გაიმართება. ამის შემდეგ აფრიკის ერთა თასი 2028, 2031 და 2033 წლებში ჩატარდება.
ფეხბურთში მომდევნო მსოფლიო ჩემპიონატი 2030 წელს გაიმართება. FIFA-ს ტრადიციის შესაბამისად, მსოფლიო ჩემპიონატის ჩატარების წელს აფრიკის ერთა თასისა და სხვა კონფედერაციების სანაკრებო ტურნირების ფინალური ეტაპები არ უნდა გაიმართოს.