აფრიკის ფეხბურთის კონფედერაციამ (CAF) აფრიკის თასის ფინალში განვითარებული ქაოსური მოვლენების შემდეგ სენეგალსა და მაროკოს მკაცრი სანქციები დაუწესა.
სენეგალის მთავარი მწვრთნელი პაპ ტიაო „არასპორტული ქცევის“ გამო ხუთმატჩიანი დისკვალიფიციით დაისაჯა და 100,000 დოლარით დაჯარიმდა.
CAF-მა განაცხადა, რომ ტიაო იმისთვის დაისაჯა, რომ მაროკოსთან ფინალურ მატჩში, სენეგალის გოლის გაუქმების შემდეგ, ფეხბურთელებს მოედნის დატოვება უბრძანა, რამაც თამაშში 14-წუთიანი შეჩერება გამოიწვია.
სენეგალის ფეხბურთის ფედერაციას ასევე გუნდის ქცევისა და გულშემატკივრების არეულობის გამო 615,000 დოლარის ჯარიმა დაეკისრა. ფეხბურთელებს, ილიმან ნდიაიესა და ისმაილა სარს, თითოეულს მსაჯის მიმართ არასპორტული ქცევის გამო ორმატჩიანი დისკვალიფიკაცია მიესაჯა.
მაროკოს მცდელობა, მატჩის შედეგი სენეგალის მოედნიდან გასვლის გამო გასაჩივრებულიყო, CAF-ის სადისციპლინო კომიტეტმა უარყო. ფინალში სენეგალმა გამარჯვება პაპე გეიეს დამატებით დროში გატანილი გოლით მოიპოვა.
დასჯას ვერ ასცდა მასპინძელი მაროკოც. CAF-მა მაროკო ბურთების მომწოდებელი ბიჭების ქცევის, VAR-ის ზონაში მოთამაშეებისა და შტაბის წევრების ქმედებების, ასევე გულშემატკივრების მიერ ლაზერების გამოყენების გამო საერთო ჯამში 315,000 დოლარით დააჯარიმა.
მაროკოს კაპიტანმა აშრაფ ჰაკიმიმ ორმატჩიანი დისკვალიფიკაცია მიიღო, თუმცა ერთი მატჩი ერთი წლის ვადით პირობითად შეჩერდა. ისმაილ საიბარი კი სამი მატჩით დაისაჯა. ორივე ფეხბურთელი არასპორტული ქცევის გამო დასაჯეს.
მაროკოელები სენეგალელი მეკარის, ედუარ მენდის პირსახოცის წართმევას ცდილობნდენ, სწორედ ეს გახდა დისკვალიფიკაციის მიზეზი.
მიუხედავად ფინალში არეულობისა, CAF-მა განაცხადა, რომ მთლიანობაში ტურნირი წარმატებული იყო და მმართველი ორგანოსთვის რეკორდული შემოსავლები მოიტანა.
