ჩაკვეტაძის ისტორიული დებიუტი - მერამდენე ქართველია გიორგი, რომელმაც სერია ა-ში ითამაშა?

იტალიის სერია ა-ს მე-4 ტურში გიორგი ჩაკვეტაძის უდინეზე მილანში სან სიროზე ინტერს დაუპირისპირდა და 3:5 დამარცხდა.

მატჩი უდინეზესთვის შესანიშნავად დაიწყო. სტუმრებმა აბანკვასასა (9') და ეკელენკამპის (16') გოლებით სწრაფი ორბურთიანი უპირატესობა მოიპოვეს, თუმცა ინტერმა პირველივე ტაიმში კარლოს აუგუსტოსა (26') და ნიკოლო ბარელას (35') ზუსტი დარტყმებით წონასწორობა აღადგინა.

მეორე ნახევარში მილანელებმა უპირატესობა მოიპოვეს და კიდევ სამი გოლი გაიტანეს (თავი ტურამმა, ესპოზიტომ და ბონიმ გამოიჩინეს). მართალია, მატჩის მიწურულს გუეიემ (90+1') სხვაობა შეამცირა, მაგრამ უდინეზემ თამაშის გადარჩენა ვეღარ შეძლო.

აღსანიშნავია, რომ შეხვედრის 76-ე წუთზე მწვრთნელმა მოედანზე გიორგი ჩაკვეტაძე შეიყვანა. ამით ქართველი ნახევარმცველი ისტორიაში მე-9 ქართველი ფეხბურთელი გახდა, რომელმაც იტალიის სერია ა-ში ითამაშა.