"ჩვენ ამ მატჩს ფინალად აღვიქვამთ, ქართველებიც ასე არიან" - აქთიურქოღლუს პრესკონფერენცია

თურქეთის ეროვნული ნაკრებისა და ფენერბაჰჩეს შემტევმა, ქერემ აქთიურქოღლუმ, საქართველოსთან მოახლოებული მატჩი პრესკონფერენციაზე შეაფასა.

"შეხვედრის მნიშვნელობას ორივე გუნდი კარგად აცნობიერებს. ჩვენ ამ მატჩს ფინალად აღვიქვამთ, ქართველებიც იგივეს ფიქრობენ. ეს იქნება თამაში, რომელსაც შეუძლია, ჯგუფში ძალთა ბალანსი განსაზღვროს. ვიცით, რომ გამარჯვება პლეი-ოფში მოხვედრის შანსებს გაგვიზრდის და მიზნისკენ კიდევ ერთი ნაბიჯით მიგვაახლოვებს.

ნაკრებში პრობლემები არ არის. ატმოსფერო ძალიან კარგია და ეს მოედანზე შედეგებზეც აისახება. ესპანეთთან მატჩის გარდა, ჩვენ ძალიან კარგად ვვითარდებით", - აცხადებს აქთიურქოღლუ.

26 წლის შემტევს, რომელსაც თურქული პრესა ხვალ ძირითადში მოიაზრებს, ეროვნულ ნაკრებში ჩატარებულ 47 მატჩში 14 გოლი და 4 ასისტი აქვს აქტივში.

გუნდები 14 ოქტომბერს, ქოჯაელში, Kocaeli Stadyumu-ზე (ტევადობა - 34 829), თბილისის დროით 22:45 საათიდან ითამაშებენ. შეხვედრას რუმინელი რადუ პეტრესკუ იმსაჯებს, პირდაპირ ტრანსლაციას კი საქართველოს პირველი არხი შემოგვთავაზებს.