თურქეთის ეროვნული ნაკრების მთავარმა მწვრთნელმა, ვინჩენცო მონტელამ, საქართველოსთან მატჩის წინ პრესკონფერენცია გამართა.
თურქების შეკრება ლილის მეკარე ბერკე იოზერმა ნებართვის გარეშე დატოვა, რაზეც ადგილობრივ პრესაში ბევრი დაიწერა, იტალიელ სპეციალისტსაც საუბრის დაწყება, გაგრძელება და დამთავრება ამ თემით მოუწია.
"ჩვენ ყოველთვის ვამბობთ, რომ გუნდში ოჯახური ატმოსფეროა, მაგრამ ამას მხოლოდ არ ვამბობთ, ჩვენ ამას ვაჩვენებთ. ყველას უნდა აქ იყოს და მოთამაშეებმა ეროვნული ნაკრებისთვის ყოველთვის უნდა იბრძოლონ.
ჩემი საქმეა, საუკეთესო მოთამაშეები შევარჩიო. ამ შერჩევისას, ვცდილობთ, მატჩიდან მატჩამდე მაქსიმალურად კარგად ვიმოქმედოთ. ამიტომ, ამ სიტუაციის განხილვისას, მე ყოველთვის ვიღებ პასუხისმგებლობას და ვიღებ ტექნიკურ გადაწყვეტილებებს. მოთამაშეებმაც უნდა აიღონ პასუხისმგებლობა. ბერკემ განაცხადა, რომ არ დაემორჩილა ტექნიკურ გადაწყვეტილებებს. ვიმეორებ, ჩვენ აქ წარმოვადგენთ ჩვენს ქვეყანასა და მის ღირსებას. თქვენ არ შეგიძლიათ დატოვოთ შეკრება ისე, რომ ამის შესახებ არავის არაფერი უთხრათ. თუ ამას გააკეთებთ, შედეგებიც მოჰყვება. სხვათა შორის, როდესაც ის პირველად ნაკრებში გამოვიძახე, მეორე დივიზიონში თამაშობდა.
ბერკე ოზერზე აღარ შევჩერდები, რადგან ხვალ უფრო მნიშვნელოვანი მატჩი გვაქვს. ვიბრძვით, რომ მოვხვდეთ მსოფლიო ჩემპიონატზე, რომელზეც დიდი ხანია აღარ ვყოფილვართ. აქ არავის აქვს ადგილი გარანტირებული. მაგალითის მოყვანა რომ მომიწიოს, მას შეეძლო, მერტ გიუნოკთან ესაუბრა და რჩევა მიეღო. მერტი ნაკრების მაისურის ჩაცმიდან 7 წლის განმავლობაში ელოდა, რომ სათამაშო დრო მიეღო. მიუხედავად იმისა, რომ ახლა არ თამაშობს, ყველას მხარს უჭერს. სწორედ ესაა, რასაც ფეხბურთელებისგან ველოდები. ეს ოჯახური ატმოსფერო უნდა შევინარჩუნოთ. გუნდის პატივისცემა ჩემთვის პატივისცემაზე მაღლა დგას. ამიტომ ველოდები, რომ ბერკე თავის ქმედებებს ახსნის", - განაცხადა მონტელამ.
გუნდები 14 ოქტომბერს, ქოჯაელში, Kocaeli Stadyumu-ზე (ტევადობა - 34 829), თბილისის დროით 22:45 საათიდან ითამაშებენ. შეხვედრას რუმინელი რადუ პეტრესკუ იმსაჯებს, პირდაპირ ტრანსლაციას კი საქართველოს პირველი არხი შემოგვთავაზებს.
