2026 წლის მსოფლიო ჩემპიონატის საკვალიფიკაციო ეტაპზე თურქეთთან გასამართი მატჩის წინ, საქართველოს ნაკრების მთავარმა მწვრთნელმა, ვილი სანიოლმა პრესკონფერენციაზე ისაუბრა.
„ჩვენთვის უმნიშვნელოვანესი მატჩია. ჯგუფში აშკარა ფავორიტი ესპანეთის ნაკრებია, რომელიც ალბათ, მსოფლიოში საუკეთესოა. რაც შეეხება თურქეთთან პირველ შეხვედრას, საწყისი წუთები არ იყო ისეთი კარგი, როგორსაც ველოდით, ცუდად დავიწყეთ, მაგრამ კარგად დავასრულეთ. ახლა ველოდები, რომ მთელი თამაშის განმავლობაში იქნება აგრესია და სწორი დამოკიდებულება, რაც აუცილებელია დადებითი შედეგისთვის.
ვიცით, საიდან მოვდივართ, როგორ განვითარდა ამ პერიოდში ქართული ფეხბურთი. ყოველთვის საჭირო არის ამბიცია, რომ შედეგს მიაღწიო. რა თქმა უნდა, ჩვენი ოცნებაა, რომ მსოფლიოს ჩემპიონატზე ვითამაშოთ 2026 წელს, რაც მოთამაშეებს ძალიან კარგად აქვთ გაცნობიერებული. ეს ოცნება რომ შევინარჩუნოთ, თურქეთთან შესანიშნავი თამაში დაგვჭირდება.
ცხოვრებაში ყველაფერი პირველად ხდება, შარშან ევროპის ჩემპიონატზე ვითამაშეთ, რაც ასევე ისტორიული იყო. ფეხბურთი იმითაა საინტერესო, რომ ასეთი სიურპრიზები ხდება. ჩვენი ისტორიის ნაწილი შარშან დავწერეთ ევროპის ჩემპიონატზე. ახლა კი მოუთმენლად ველით, რომ ბავშვებისთვის კიდევ ბევრი დადებითი ისტორია დავწეროთ.
რა საუბარი გვქონდა ფეხბურთელებთან, ამაზე არ ვისაუბრებ, რადგან ეს ჩვენს შორის რჩება. ეს არის ჩვეულებრივი სამუშაო გარემო. რაც შეეხება მარცხენა მცველის პოზიციას, ეს არაა დღევანდელი პრობლემა. ჩემი აზრით, ჩვენ ჯერ ვერ ვიპოვეთ სწორი გამოსავალი. არ ვგულისხმობ მოთამაშეებს, არამედ მარცხენა ფლანგზე სწორად თამაშის სისტემას. აზაროვმა ჩვენთან საკმაოდ ბევრი თამაში ჩაატარა, მაგრამ შახტარში მას არ აქვს სათამაშო პრაქტიკა, ამიტომ, მისთვის რთული სიტუაციაა. მიუხედავად ამისა, დარწმუნებული ვარ, ვინც არ უნდა ითამაშოს ამ პოზიციაზე, კარგად ითამაშებს.
შეგიძლია გუნდის შემადგენლობა შეცვალო, ეს არის მწვრთნელის საქმე, რომ იპოვოს სწორი კომბინაცია. თუმცა მთლიანობაში, უფრო მნიშვნელოვანია ის იდენტობა, რაც უნდა გვქონდეს მოედანზე მთელი თამაშის განმავლობაში. დარწმუნებული ვარ, რომ ესპანეთთან თამაშისგან განსხვავებული იდენტობა იქნება, რადგან მხოლოდ საკუთარი იდენტობითა და თვისებებით შეგვიძლია რაღაც განსაკუთრებულის შექმნა. ყველამ ვიცით, რომ თუ 2-3%-საც დავაკლებთ, შანსი არ გვექნება. თუმცა როგორც უკვე ვთქვი, ფეხბურთელებთან ბევრი ვისაუბრეთ და დარწმუნებული ვარ, რომ ისინი სრულად მოტივირებულები არიან, რათა სრულიად განსხვავებულად წარმოვაჩინოთ თავი“, - თქვა სანიოლმა.
თურქეთისა და საქართველოს მატჩი 14 ოქტომბერს, 22:45 საათზე გაიმართება.
თურქეთი V საქართველო - პრევიუ
