მომავალ თვეში მადრიდის რეალს შესაძლოა ოქროს ბურთის კიდევ ერთი გამარჯვებული ჰყავდეს.
მას შემდეგ, რაც 2024 წელს ვინისიუს ჟუნიორს ჯილდოს მოპოვებამდე ძალიან ცოტა დააკლდა, მადრიდულ კლუბში დარწმუნებულები არიან, რომ 26 ოქტომბერს, როდესაც France Football გამარჯვებულს დაასახელებს, პრიზს კილიან მბაპე მიიღებს.
მბაპეს ამისთვის საკმაოდ ძლიერი არგუმენტები აქვს, მან ლა ლიგის, ჩემპიონთა ლიგისა და 2026 წლის მსოფლიო ჩემპიონატის საუკეთესო ბომბარდირის ჯილდოები მოიპოვა.
რეალის მაისურით ფრანგმა 42 გოლი გაიტანა და 7 საგოლე გადაცემა შეასრულა, თუმცა მის წინააღმდეგ შესაძლოა ის ფაქტი მოქმედებდეს, რომ გუნდური ტიტულები ვერ მოიგო.
ასე ფიქრობს ლამინ იამალიც, რომელიც ასევე 2026 წლის ოქროს ბურთის ერთ-ერთი პრეტენდენტია. ბარსელონას ფეხბურთელს Universo Valdano-სთან ინტერვიუში ჰკითხეს, რას ფიქრობდა ამ საკითხზე. იამალმა აღიარა, რომ ის და მბაპე ორი მთავარი კანდიდატები არიან, თუმცა მიაჩნია, რომ უპირატესობა თავად აქვს.
„ვის გადავცემდი ჯილდოს? მსოფლიოს საუკეთესო ფეხბურთელს. ვის გადასცემენ? ამაზე საუბარი ძალიან დიდხანს შეიძლება.
გულწრფელად ვფიქრობ, რომ მსოფლიოში საუკეთესო შეიძლება ორი ფეხბურთელი იყოს. ვფიქრობ, წელს მე ვიმსახურებ ჯილდოს იმის გამო, რაც მოვიგე.
ჩემთვის მბაპე და მე მსოფლიოს ორი საუკეთესო ფეხბურთელი ვართ. ჩემთვის ეს სრულიად ნათელია და ყველამ, ვინც მატჩებს უყურებს, ეს იცის.“
ლამინ იამალი ბარსელონას ლა ლიგის მოგებაში დაეხმარა, ესპანეთის ნაკრებთან ერთად კი მსოფლიო ჩემპიონი გახდა. საკლუბო დონეზე მან 24 გოლი გაიტანა და 18 საგოლე გადაცემა შეასრულა.
რაც შეეხება მბაპეს, მისი ინდივიდუალური სტატისტიკა თავისთავად მეტყველებს. იმის გათვალისწინებით, რომ ოქროს ბურთი ინდივიდუალური ჯილდოა, ფრანგს ნამდვილად აქვს საფუძველი იფიქროს, რომ 2026 წელი სწორედ მისი იქნება და პრესტიჟულ პრიზს სახლში წაიღებს.
