ინსაიდერ მატეო მორეტოს ინფორმაციით, ტოტენჰემმა ბორნმუთის ცენტრალურ მცველთან, მარკოს სენესისთან, ოთხწლიან კონტრაქტზე სიტყვიერ შეთანხმებას უკვე მიაღწია.
29 წლის ფეხბურთელი, სავარაუდოდ, მიმდინარე ზაფხულს ტოტენჰემის ერთ-ერთი პირველი შენაძენი გახდება.
ლონდონელები სენესისათვის ბრძოლაში ყოველთვის ფავორიტებად ითვლებოდნენ, თუმცა ეს ტრანსფერი მთლიანად იმაზე იყო დამოკიდებული, შეინარჩუნებდა თუ არა გუნდი ადგილს პრემიერ ლიგაში. მას შემდეგ, რაც ბოლო ტურში ევერტონთან მატჩში 1-0 გაიმარჯვეს, ტოტენჰემს უკვე შეუძლია სენესისთან გარიგება ოფიციალურად დაასრულოს და ლივერპულის ინტერესიც უკან ჩამოიტოვოს.
არგენტინელი ცენტრალური მცველი ბორნმუთს თავისუფალი აგენტის სტატუსით ტოვებს, რადგან მას კლუბთან კონტრაქტი უმთავრდება.
სენესი ბორნმუთიდან საკმაოდ შთამბეჭდავი სეზონის შემდეგ მიდის, სადაც გუნდს ევროპა ლიგის საგზურის მოპოვებაში დაეხმარა. 2022 წელს ფეიენოორდიდან გადმოსვლის შემდეგ, მან 100-ზე მეტი მატჩი ჩაატარა და მიმდინარე სეზონში 5 საგოლე გადაცემითაც გამოიჩინა თავი.
ტოტენჰემის მთავარმა მწვრთნელმა, რობერტო დე ძერბიმ, ხელმძღვანელობას ამ ტრანსფერზე მწვანე შუქი უკვე აუნთო, რადგან დაცვის ხაზის გაძლიერება კლუბის მთავარი პრიორიტეტია. მიმდინარე სეზონში ტოტენჰემზე მეტი გოლი მხოლოდ გავარდნილმა გუნდებმა გაუშვეს.
სენესის გარდა, ტოტენჰემი ძალიან ახლოს არის ენდრიუ რობერტსონის გაფორმებასთანაც, რომელიც ლივერპულიდან წამოვიდა. გავრცელებული ცნობებით, შოტლანდიელ მცველთან სიტყვიერი შეთანხმება ჯერ კიდევ მანამ იყო მიღწეული, სანამ სპურსი პრემიერ ლიგაში დარჩენას ოფიციალურად გაინაღდებდა.
რობერტსონი ლივერპულს ენფილდზე გატარებული 9 წარმატებული წლის შემდეგ ტოვებს. მისი გამოცდილება და ლიდერული თვისებები ტოტენჰემის დაცვის მარცხენა ფლანგს მნიშვნელოვნად გააძლიერებს, რაც გუნდს მომავალ სეზონში გასავარდნ ზონასთან ბრძოლის თავიდან აცილებაში დაეხმარება.
